- वि.सं २o८१ पौष २६ शुक्रबार
राष्ट्रिय खेलकुद परिषद्का सदस्यसचिव टंकलाल घिसिङले दसाैँ राष्ट्रिय खेलकुद प्रतियोगिताको तयारी उच्च प्राथमिकताका साथ भइरहेको बताएका छन् । कर्णाली प्रदेश रंगशालाको अनुगमनका क्रममा सदस्यसचिव घिसिङले गत मंसिर २१ गते बसेको परिषद्को ११८औँ बैठककाे निर्णयअनुसार आगामी चैत २३ गतेदेखि सुर्खेतमा आयोजना हुने दसाैँ राष्ट्रिय खेलकुद प्रतियोगिताको तयारीलाई उच्च प्राथमिकतामा राखेर काम भइरहेको बताए ।
उनले पूर्वाधार निर्माणका लागि प्रदेश सरकारले गरिरहेका कामकाे उच्च प्रशंसा गरे । ‘पूर्वाधार निर्माणमा कर्णाली प्रदेश सरकारले यो स्तरमा लगानी गरेको पहिलो र उत्कृष्ट काम हो । यहाँको कामको स्थितिले दसाैँ राष्ट्रिय खेलकुद प्रतियोगिता तोकिएकाे समयमा हुँदैन कि भन्ने संशय लिनुपर्ने अवस्था छैन,’ उनले भने ।
सदस्यसचिव घिसिङका अनुसार प्रतियोगितामा समावेश हुने ३६ खेलमा २४ खेल कर्णालीमा खेलाइने र उद्घाटनपूर्व पनि केही खेल सञ्चालन गरिनेछन् । उनले नेपाली राष्ट्रिय खेलकुदको इतिहासमा पहिलोपटक ६० करोड बजेट छुट्याएको र यसबाट खेलाडीलाई राहत हुने गरी काम गरिने बताए ।
कर्णाली प्रदेश सरकारका सामाजिक विकासमन्त्री घनश्याम भण्डारीले आयोजकको तयारी र योजनाअनुसार आफूहरू समयमै प्रतियोगिता हुने गरी काममा लागिपरेको बताए । उनले कर्णाली प्रदेश खेलकुद विकास परिषद्का रिक्त पदाधिकारी नियुक्तिका विषयमा आवश्यक तयारी भइरहेको जानकारी दिए ।
