विपत् प्रवावित सडक पुनर्निर्माणका लागि प्रदेश सरकराले १५ करोड २५ लाख उपलब्ध गराउने

बागमती प्रदेश सरकारले विपत् प्रभावित सडक तथा पूर्वाधार पुनर्निर्माणका लागि १५ करोड २५ लाख रुपैयाँ उपलब्ध गराउने निर्णय गरेको छ । प्रदेश सरकारको शुक्रबार बिहान बसेको बैठकले विपत् प्रभावित प्रादेशिक सडक तथा पूर्वाधार निर्माणका लागि १५ करोड २५ लाख रुपैयाँ उपलब्ध गराउने निर्णय गरेको हो ।

विपत् प्रभावित हेटौँडा–काठमाडौं सडकका लागि ११ करोड २५ लाख रुपैयाँ र प्रदेशका अन्य सडक तथा पूर्वाधार मर्मतका लागि चार करोड रुपैयाँ बजेट व्यवस्था गर्ने निर्णय गरेको प्रदेश सरकारका प्रवक्ता एवं आन्तरिक मामिलामन्त्री सुरजचन्द्र लामिछानेले जानकारी दिए ।

उनका अनुसार बैठकले सिमखोलमा बेलिब्रिज राख्न दुई करोड रुपैयाँ, सडक मर्मतका लागि ५० लाख रुपैयाँ, कुलेखानी–महालक्ष्मी–खोला–फाखेल खण्ड मर्मतका लागि २५ लाख रुपैयाँ, सिस्नेरी खण्डको सडक पुनर्निर्माणका लागि ६ करोड रुपैयाँ र सिस्नेरी–छैमले खण्डको सडक पुनर्निर्माणका लागि दुई करोड ५० लाख रुपैयाँ व्यवस्था गर्ने निर्णय भएको छ ।

बैठकले उक्त बजेट आर्थिक मामिला तथा योजना मन्त्रालयको अर्थ विविध र विषयगत मन्त्रालयको बजेटबाट व्यवस्था गर्ने निर्णय गरेको पनि प्रवक्ता लामिछानेले जानकारी दिए । बिहीबार सम्पन्न प्रदेश विपत् परिषद्को बैठकमा भौतिक पूर्वाधार विकास मन्त्रालयले प्रस्ताव गरेअनुसारको बजेट व्यवस्था गर्ने निर्णय गरेको उनको भनाइ छ ।

यस्तै, बैठकले संघीय सरकारबाट सरुवा भएर आएका सचिव वीरेन्द्रदेव भारतीलाई प्रदेशको श्रम, रोजगार तथा यातायात मन्त्रालयमा पदस्थापन गर्ने निर्णय गरेको छ भने प्रदेश सरकारले ११औँ तहमा बढुवा गरेका निरञ्जन श्रेष्ठलाई वन अनुसन्धान तथा प्रशिक्षण केन्द्र ललितपुरमा पदस्थापन गर्ने निर्णय गरेको छ । बैठकले स्वास्थ्य संस्था आशयपत्र सेवा सञ्चालन अनुमति नवीकरण तथा स्तरोन्नति मापदण्ड स्वीकृत गर्ने निर्णय पनि गरेको छ ।