- वि.सं २o८१ पौष ११ बिहीबार
नेपाल एप्लाइड म्याथमेटिक्स एन्ड इन्फरमेटिक्स इन्स्टिच्युटले एनुअल नेपाल एआई स्कुलको आयोजना गर्ने घोषणा गरेको छ । इन्स्टिच्युटले बुधबार काठमाडौंमा पत्रकार सम्मेलन गर्दै ११ दिने शैक्षिक कार्यक्रम गर्ने बताएको हो । यस वर्ष १२ देखि २२ पुससम्म कार्यक्रम पाँचौँ संस्करण आर्टिफिसियल एन्टिलिजेन्सको आधार र कार्यान्वयनमा केन्द्रित हुनेछ ।
संसारभरबाट वैज्ञानिक, प्राध्यापक, र सहभागीहरूलाई एआईसम्बन्धी गहन व्याख्यान, प्रयोगशाला र परियोजना कार्यका लागि एकै ठाउँमा ल्याउने यो कार्यक्रम दक्षिण एसियाकै सबैभन्दा ठुलो र सबैभन्दा पृथक् भएको बताइएको छ ।
आयोजकका अनुसार यो कार्यक्रम आधारभूतदेखि आधुनिक विचार र विधिसम्मका विषयवस्तुलाई समेट्नेछ । कार्यक्रम ललितपुरको खुमलटारस्थित प्रिमियर इन्टरनेसनल स्कुलमा आयोजना हुँदै छ । यस कार्यक्रममा कम्प्युटर विज्ञानका स्नातक, स्नातकोत्तर र पिएचडी तहका २०० जना विद्यार्थी तथा एआई क्षेत्रमा काम गर्ने प्रोफेसनलहरूको सहभागी हुँदै छ । विगत चार संस्करणमा ४० भन्दा बढी देशका ५५० भन्दा बढी विद्यार्थीले यस कार्यक्रममा भाग लिएका छन् ।
‘सानो ठाउँबाट ठुला परिवर्तन आउन सक्छ,’ भन्ने मान्यतामा आधारित यस वर्षको एआई स्कुलले नेपाली र अन्तर्राष्ट्रिय विद्यार्थी तथा एआई अभ्यासकर्तालाई विश्वस्तरमा भइरहेको अत्याधुनिक विकाससँग परिचित गराउने लक्ष्य राखेको छ । विश्वभरका २५ जना वैज्ञानिक र प्राध्यापकले कार्यक्रममा भौतिक कक्षा सञ्चालन गर्नेछन् । इन्स्टिच्युटका निर्देशक तथा अनुसन्धान वैज्ञानिक विशेष खनालले यो कार्यक्रम दक्षिण एसियामा उत्कृष्ट अन्तर्राष्ट्रिय विशेषज्ञबाट सिक्ने र अन्तरक्रिया गर्ने सुनौलो अवसर भएको बताए ।
‘नेपालमा एआईको उपयोग गर्ने सरकारको योजना र एआई नीतिको तयारी भइरहेको अवस्थामा यो कार्यक्रमले आवश्यक छलफल सिर्जना गर्न र नेपालमा एआईविज्ञ निर्माण गर्न मद्दत पुर्याउनेछ,’ उनले बताए । इन्स्टिच्युट एजुकेसन आउटरिच प्रमुख आलोक खत्रीले ११ दिनसम्म विश्वस्तरीय विशेषज्ञसँग सिक्ने, व्यावहारिक कार्यशालामा भाग लिने र आफ्नो व्यावसायिक सञ्जाल विस्तार गर्ने अवसर पनि प्राप्त हुने बताए ।
