नेपाल राष्ट्रिय फुटबल टोलीका मुख्य प्रशिक्षक अब्दुल्लाह अल्मुताइरीले आइतबार नेपाली राष्ट्रिय फुटबल टोलीको सहयात्रा समाप्त भएको घोषणा गरेका छन् । अल्मुताइरीले सामाजिक सञ्जालबाट नेपाली टोलीसँग सहयात्रा सकिएको सार्वजनिक गरेका हुन् । उनले अखिल नेपाल फुटबल संघ (एन्फा)लाई समेत टोली छाडेको पत्र पठाएका छन् । अल्मुताइरीले आफूले पाँच सय २५ दिनपछि टोली छाडेको बताएका छन् । ‘५ सय २५ दिन नेपाली फुटबलमा काम गरेँ । यससँगै राष्ट्रिय टोलीसँगको कार्यकाल समाप्त भएको घोषणा गर्दछु । खुसी, माया, दुःख र पीडामा मलाई साथ दिने सम्पूर्णमा धन्यवाद, ‘वान टिम, जय नेपाल’, अलमुताइरीले लेखेका छन् ।
असार तेस्रो साता नेपाली टोलीसँगै कुवेत पुगेका अल्मुताइरीले आफू बिदामा बसेको जनाएका थिए । नेपाली टोली साउन पहिलो साता नै नेपाल फर्किए पनि अल्मुताइरी कुवेतमै बसे । एन्फाले अल्मुताइरी बिदामा रहेको जनाउँदै प्रदीप हुमागाईंलाई राष्ट्रिय टोलीको कार्यवाहक प्रशिक्षक घोषणा गर्यो ।
एन्फा अध्यक्ष पंकजविक्रम नेम्वाङले शनिबार कतार फुटबल एसोसिएसनका अध्यक्ष हमाद विन खलिफालाई भेट गरेका थिए । यसको भोलिपल्टै (आइतबार) अल्मुताइरीले टोली छोड्ने घोषणा गरेका हुन् । पछिल्लो समय एन्फाले कतार फुटबल संघसँग अब्दुल्लाहको विकल्प चाहेको थियो । अल्मुताइरीलाई तत्कालीन एन्फा अध्यक्ष कर्माछिरिङ शेर्पाको नेतृत्वले कतार फुटबलको अनुदानमा ०७७ साल चैत तेस्रो साता नेपाल झिकाएको थियो ।
विवादमुक्त भएन कार्यकाल
प्रशिक्षणको जिम्मेवारी सम्हालेपछि कुवेती नागरिक अल्मुताइरीले नेपाल आएको दुई महिनापछि इराकविरुद्ध पहिलो मैत्रीपूर्ण खेल खेलाएका थिए । नेपालमा आएको चार महिनाभित्र उनले समर्थकमाझ एक प्रकारको भावनात्मक सम्बन्ध गाँसे । सामाजिक सञ्जाल पूरै अल्मुताइरीमय बनेको थियो । ०७८ साउन दोस्रो साता तत्कालीन एन्फा वरिष्ठ उपाध्यक्ष नेम्बाङले आफूलाई काम गर्ने वातावरण नदिएको भन्दै सामाजिक सञ्जालमा राजीनामा दिने घोषणा गरे । उनले एन्फासमक्ष राजीनामापत्र बुझाएनन् । मिडियाले आफूविरुद्ध लेख्न थालेको भन्दै उनले खेलाडीलाई आफ्नो पक्षमा बोल्न र फेसबुकमा स्टाटस राख्न लगाए । ०७८ भदौमा माल्दिभ्समा भएको साफ च्याम्पियनसिपमा शीर्ष दुईमा रहँदै नेपाल पहिलोपटक फाइनलमा प्रवेश गर्यो ।
नेपाली राष्ट्रिय टोलीबाट १६ खेलाडीलाई डेब्यु गराएका अल्मुताइरीको प्रशिक्षण समयमा नेपालले आधिकारिक १७ खेलमा पाँच जित, दश हार र दुई बराबरी नजिता व्यहोरेको थियो
माल्दिभ्सबाटै राजीनामा दिने घोषणा गरे । तर, उनले राजीनामा दिएनन् । उनले एन्फासँग थप एक वर्षको सम्झौता नवीकरण गरे । तत्कालीन अध्यक्ष शेर्पानिकट रहँदै उनले काम गरे । उनको समयमा खेलाडीले दबाबको महसुस गरेका थिए । खेलाडीले आधारभूत सुविधा माग गर्दा अल्मुताइरीले गाली गरेको भन्दै नियमित टोलीका १० खेलाडीले गत १५ वैशाखमा होटेल छाडे । तत्कालीन राष्ट्रिय टोलीका कप्तान र गोलरक्षक किरणकुमार लिम्बुले अलमुताइरीलाई ‘बुबा’कै उपनाम दिएका थिए । अलमुताइरीसँग सम्बन्ध बिग्रँदा किरणले टोलीमा स्थान बनाउन सकेनन् । भिक्टोर राणाको संयोजकत्वमा खेलाडी–प्रशिक्षक विवाद छानबिन समिति बनेको थियो । जेठ पहिलो साता समितिले प्रशिक्षक अल्मुताइरीले विकल्प खोेज्न २८ पृष्ठको प्रतिवेदन एन्फामा बुझाएको थियो । प्रतिवेदनलाई आधार बनाउँदै एन्फामा निर्वाचित भएपछि नेम्बाङ नेतृत्वले अल्मुताइरीलाई बर्खास्त गर्न चाहन्थ्यो । अल्मुताइरीले आफ्नो सम्झौताविपरीत एन्फाले बर्खास्त गरे एएफसी र फिफामा जाने चेतावनी दिए । अध्यक्ष नेम्बाङ र कतार फुटबलका अध्यक्ष खलिफाबीच भेटपछि अल्मुताइरीले आफैँ नेपाल छाड्ने घोषणा गरेका छन् ।
सधैँ चर्चामा रहने चाहना
अलमुताइरी मैदानभित्र र बाहिर सधैँ चर्चाको केन्द्रबिन्दुमा आफूलाई राख्थे । कहीले गोल गरेपछिको सेलेब्रेसन भने कहिले म्याच अफिसियलसँग झगडा गर्दै अल्मुताइरीलाई चर्चाको शिखरमा राखे । उनले नेपालमा रहँदा आफ्नो प्रमुख शत्रु नै सञ्चारमाध्यमलाई बनाए । पछिल्लो समय पंकज नेतृत्वमा रहेको एन्फा र अल्मुताइरीबीचको सम्बन्ध राम्रो भएन । मैदानबाहिर खेलाडीलाई अनुशासनमा कडाइ गर्न थाले । यतिसम्म कि मिडियासँग खेलाडी बोल्दा आफू पछाडि बसेर के बोल्छन्, खुबै ध्यानमा दिन्थे । क्याम्पबाहिर रहँदासमेत खेलाडीलाई बढी अनुशासनमा राख्दा खेलाडी नै अल्मुताइरीको विरोधमा उत्रन थालेका थिए । यद्यपि, सामाजिक सञ्जालमा ‘कमेन्ट’ ‘म्यासेज’ र ‘लाइभ’मा रमाइलो गर्न पुग्ने अल्मुताइरी समर्थकमाझ सधैँ प्रिय रहे ।
१७ आधिकारिक खेल
नेपाल आएपछि अल्मुताइरीको पहिलो आधिकारिक खेल इराकविरुद्ध थियो । अन्तिम खेल भने कुवेतमै इन्डोनेसियाविरुद्ध थियो । संयोग, दुवै खेलमा नेपाल जितविहीन रह्यो । अल्मुताइरी आएपछि नेपालले १७ आधिकारिक (फिफा मान्यता पाएको) खेल खेलेको छ । जसमा ५ खेलमा जित निकाल्दा २ खेल बराबरीमा सकिएको छ । अल्मुताइरीको प्रशिक्षणमा नेपाल १० खेलमा पराजित भएको छ । यस्तै, आधिकारिक खेलमा १४ गोल गर्दा ३६ गोल बेहोरेको थियो । अल्मुताइरी नेपाल रहँदा समग्रमा २२ खेल खेलाए । अल्मुताइरीले पहिलो खेल ०७८ साल जेठ १५ मा इराक र अन्तिम खेल गत जेठ ३१ गते इन्डोनेसियाविरुद्ध रह्यो । जुन खेलमा नेपाल ७–० ले पराजित भएको थियो ।
१६ खेलाडीको डेब्यु
अल्मुताइरीले आफ्नो प्रशिक्षणकालमा १६ खेलाडीलाई डेब्यु गराए । पहिलो खेलमै इराकविरुद्ध दुई खेलाडीलाई डेब्यु दिए । इराकविरुद्ध मैत्रीपूर्ण खेलमा मनीष डाँगी र गौतम श्रेष्ठले डेब्यु पाए । आफ्नो कार्यकालमा अलमुताइरीले यी दुवै खेलाडीलाई खुबै मन पराएका थिए । यसपछि उनले फिफा विश्वकप छनोटमा आयुष घलान, कमल थापा र सुरजज्यु ठकुरीलाई इन्जुरी समयमा मौका दिए । भारतविरुद्ध घरेलु मैदानमा नितिन थापा, राजन गुरुङ र गोलरक्षक विशाल श्रेष्ठलाई डेब्यु गराए । ए डिभिजन लिगमा उत्कृष्ट प्रदर्शन गरेका सुदीप गुरुङ, आकाश बुढामगर, नवीन गुरुङलाई अफ्रिकन प्रतिद्वन्द्वी मौरिसससँग मौका दिए । प्रशान्त अवस्थीले थाइल्यान्डमा डेब्यु पाए । गोलरक्षक दीप कार्की, विकास तामाङ, नीरकुमार राई र शिव गुरुङले अल्मुताइरीको कार्यकालमा अन्तर्राष्ट्रिय फुटबलको स्वाद पाए । अन्तिम खेलमा नीरकुमार र शिवले डेब्यु पाएका थिए ।
उहाँले नेतृत्वलाई सहयोग गर्नुभएको हो : सुरेश शाह, प्रवक्ता, एन्फा
हामीलाई उहाँको मेल प्राप्त भएको छ । हामीबीचमा भएको सम्झौता छाडेको भन्नुभएको छ । उहाँ अस्वस्थ पनि हुनुहुन्थो । एकपक्षीय रुपमा काम गर्न असफल छु जस्तो कुरा गर्नुभयो । उहाँले यो नेतृत्वलाई सहयोग गर्न खोजेको जस्तो बुझेँ । बिदामा हुनुहुन्थ्यो, असहज महसुस गर्नुभयो । पछिल्लो समय विवाद धेरै भएकाले अलग रहने निर्णय लिनुभएको होला । अब हामीलाई प्रो लाइसेन्स प्रशिक्षक चाहिन्छ । हामी नयाँ प्रक्रियाका लागि जान्छौँ ।
