गुरुङले गल्ती महसुस गरेकाले रिहा गर्न अनुरोध गरियो : मन्त्री
गल्ती नै गरेको छैन, किन महसुस गर्नु : गुरुङ
चौतर्फी विरोध र आलोचना भएपछि सरकारले पर्यटनमन्त्री जीवनराम श्रेष्ठको निर्देशनमा पक्राउ गरिएका गरुड सेक्युरिटिजका सुरक्षा गार्ड शेरजंग गुरुङलाई साधारण तारेखमा छाडेको छ । गृहमन्त्री बालकृष्ण खाणको निर्देशनपछि जिल्ला प्रशासन कार्यालय काठमाडौंले उनलाई छाडेको हो ।
सरकारी भ्रमणमा क्यानडा जान भिसा प्रोसेसका लागि पत्नी र नागरिक उड्डयन प्राधिकरणका कर्मचारीसहित शुक्रबार ठमेलस्थित भिएफएस ग्लोबलको कार्यालय पुगेका मन्त्री श्रेष्ठको टोली सरासर भित्र पस्न लागेपछि सेक्युरिटी गार्ड गुरुङले आमसेवाग्राहीझैँ लाइनमा बस्न आग्रह गरेका थिए । तर, मन्त्री श्रेष्ठले आफूमाथि दुव्र्यवहार भएको भन्दै उनलाई पक्राउ गर्न लगाएका थिए ।
गुरुङलाई जिल्ला प्रशासनले आइतबार मात्रै थप अनुसन्धान गर्न भन्दै पाँच दिनको म्याद थप गरेको थियो । गृहमन्त्री खाणको निर्देशनपछि प्रशासनले उनलाई सोमबार साँझ पत्नी लक्ष्मी गुरुङको जिम्मा लगाएको हो । जिल्ला प्रहरी परिसर काठमाडौंका प्रवक्ता एसपी दिनेश मैनालीले गुरुङलाई साधारण तारेखमा छाडिएको बताए ।
अभिषेक कार्की, प्रशासकीय अधिकृत, गरुड सेक्युरिटिज
हाम्रोतर्फबाट कुनै गल्ती नै भएको छैन । त्यसैले हामीले कसैसँग माफी मागेका छैनौँ । तर, दबाब भने नआएको होइन । फोन आएको हो । तर, हामीले त्यसलाई वास्ता नै गरेनौँ ।
‘गुरुङ अभद्र व्यवहार कसुरमा पक्राउ परेका थिए । उनीविरुद्ध पाँच दिनको म्याद पनि थप भएको थियो । हामीले अनुसन्धान सकेर सोमबार नै प्रतिवेदन पेस गर्यौँ । सोही प्रतिवेदनपछि उनलाई साधारण तारेखमा छाडिएको छ,’ मैनालीले भने । गुरुङलाई काठमाडौं प्रशासनले आगामी ४ कात्तिकमा हाजिर हुन भनेको छ ।
रिहाइपछि गुरुङले आफू निर्दोष भएको र मन्त्रीसहितको टोलीलाई ‘लाइन बस्न’ आग्रह गरेकै कारण जबर्जस्ती फसाइएको बताए । ‘मेरो कुनै दोष छैन । मैले उहाँहरूलाई लाइनमा बस्नु मात्रै भनेको हुँ । तर, उहाँले मान्नुभएन । उल्टै मसँग झगडा गर्न आउनुभयो । मैले त इमानदारीपूर्वक आफ्नो ड्युटी निभाएको हुँ,’ उनले नयाँ पत्रिकासँग भने, ‘उहाँहरूले त्यसैलाई निहुँ बनाएर मलाई फसाउनुभयो । मेरो र उहाँहरूबीच शुक्रबार छाया सेन्टरमा भएको घटना सिसिटिभी फुटेजमा पनि सुरक्षित होला । त्यो हेर्न सकिन्छ । मलाई ढाँट्न आउँदैन । ढाँटेर के नै जित्नु छ मलाई ।’
मन्त्री श्रेष्ठले आफूमाथि गुरुङले दुव्र्यवहार गरेको भन्दै कारबाहीका लागि शुक्रबार गृह मन्त्रालयलाई पत्र लेखेका थिए । सोही पत्रपछि उनलाई प्रहरीले त्यही दिन बिहान ११ बजे पक्राउ गरेको थियो । भिसाका लागि बायोमेट्रिक परीक्षण गराउन उनी ठमेलको छाया सेन्टरस्थित ‘भिएफएस ग्लोबल’को कार्यालय पुगेका थिए । त्यही क्रममा सेक्युरिटी गार्ड गुरुङले उनीहरूलाई लाइनमा बस्न आग्रह गर्दा मन्त्री श्रेष्ठ आक्रोशित बनेका थिए ।
घटना सार्वजनिक भएपछि मन्त्री श्रेष्ठको चौतर्फी आलोचना सुरु भयो । दबाबमा आएका उनले गरुड सेक्युरिटिज र गुरुङले माफी मागेकाले रिहा गर्न भनेको दाबी गरेका छन् । तर, सेक्युरिटिज कम्पनी र गुरुङले भने आफूहरूले गल्ती नै नगरेकाले माफी माग्नुपर्ने कारण नै नभएको बताए ।
सेक्युरिटिजका प्रमुख प्रशासकीय अधिकृत अभिषेक कार्कीले नयाँ पत्रिकासँग भने, ‘हाम्रोतर्फबाट कुनै गल्ती नै भएको छैन । त्यसैले हामीले कसैसँग माफी मागेका छैनौँ । तर, दबाब भने नआएको होइन । फोन आएको हो । तर, हामीले त्यसलाई वास्ता नै गरेनौँ ।’
गुरुङकी पत्नी लक्ष्मीले सोमबार नै सर्वोच्च अदालतमा बन्दी प्रत्यक्षीकरणको रिट निवेदन दिएकी छिन् । जसको मंगलबार पेसी तोकिएको छ । गरुड सेक्युरिटिजका प्रमुख प्रशासकीय अधिकृत अभिषेक कार्कीले बन्दी प्रत्यक्षीकरणको रिट निवेदन दर्ता भएको र पेसी मंगलबारका लागि तोकिएको बताए ।
प्रक्रिया पुर्याएर गृह मन्त्रालयले रिहा गर्न भनेका गुरुङविरुद्ध प्रहरी वृत्त दरबारमार्गमा मन्त्री श्रेष्ठका अंगरक्षकले अभद्र व्यवहार कसुरअन्तर्गत जाहेरी दिएका थिए । त्यसकै आधारमा उनलाई पक्राउ गरिएको थियो ।
यता काठमाडौं उपत्यका प्रहरी कार्यालय रानीपोखरीले घटनाको छानबिन गर्न जिल्ला प्रहरी परिसर काठमाडौंका प्रवक्ता एसपी दिनेश मैनालीको नेतृत्वमा छानबिन समिति गठन गरेको छ । यसअघि प्रहरी वृत्त दरबारमार्गका एक प्रहरी निरीक्षक विकास तामाङलाई जिम्मेवारीबाट हटाइएको छ । कार्यालय प्रमुख एआइजी रवीन्द्र धानुकले घटनाको छानबिन गर्न एसपीको नेतृत्वमा छानबिन समिति गठन गरिएको र प्रहरी निरीक्षकलाई जिम्मेवारीबाट हटाएको बताए ।
उनले भने, ‘घटना छानबिन गर्न एसपीको नेतृत्वमा समिति गठन गरिएको छ । वृत्तका एक प्रहरी निरीक्षकलाई जिम्मेवारीबाट तानिएको छ । समितिले प्रहरीको आन्तरिक विषयमा छानबिन गर्नेछ ।’
प्रहरी हिरासतमा रहेका गुरुङलाई भेट्न राष्ट्रिय स्वतन्त्र पार्टीका अध्यक्ष रवि लामिछाने प्रहरी वृत्त दरबारमार्ग पुगेका थिए । गुरुङसँग बसेर खिचेको फोटो उनले सामाजिक सञ्जालमार्फत सार्वजनिक गरेका थिए । हिरासतमा भएका व्यक्तिको फोटो खिचेको विषयमा पनि समितिले छानबिन गर्नेछ ।
