चिनियाँ कम्युनिस्ट पार्टी (सिपिसी) अन्तर्राष्ट्रिय सम्पर्क विभागका नवनियुक्त प्रमुख लिउ जियानचाओ आइतबार चारदिने भ्रमणका क्रममा नेपाल आउने भएका छन् । अन्तर्राष्ट्रिय सम्पर्क विभागको प्रमुखमा नियुक्त भएपछि उनको पहिलो भ्रमण नेपालबाट हुँदै छ ।
नेपालमा रहँदा उनले राष्ट्रपति विद्यादेवी भण्डारी, प्रधानमन्त्री शेरबहादुर देउवा, एमाले अध्यक्ष केपी ओली, माओवादी अध्यक्ष प्रचण्ड, एकीकृत समाजवादीका अध्यक्ष माधवकुमार नेपाललगायत नेतासँग भेटवार्ता गर्ने कार्यक्रम छ ।
यसबीचमा एमाले अध्यक्ष ओली, माओवादी केन्द्रका अध्यक्ष प्रचण्ड र कांग्रेस नेता डा. नारायण खड्कासँग भिडियोमार्फत संवाद गरेका लिउ प्रत्यक्ष रूपमा संवादका लागि आउन लागेका हुन् । लिउले १८ जेठदेखि पार्टीको अन्तर्राष्ट्रिय समन्वय विभागको जिम्मेवारी लिएका थिए । उनले ९ असारमा प्रचण्ड, १० असारमा ओली र १६ असारमा खड्कासँग भिडियो संवाद गरेका थिए ।
एमाले विदेश विभाग प्रमुख डा. राजन भट्टराईले ओलीसँग नेता लिउको भेटवार्ताको मिति अझै तय भइनसकेको बताए । परराष्ट्र प्रवक्ता सेवा लम्सालले भने उनको भ्रमणबारे जानकारी नभएको प्रतिक्रिया दिएकी छिन् ।
