यो सिजनमा अनुमति लिएका बाँकी आरोही पनि यसै साता शिखरमा पुगिसक्ने पर्यटन विभागको भनाइ
चालू वर्षको वसन्तकालीन सिजनमा शेर्पासहित चार सय ८० आरोहीले सगरमाथाको चुचुरो चुुमेका छन् । अधिकांश आरोही यसै हप्ताभित्र शिखरमा पुगिसक्ने पर्यटन विभाग पर्वतारोहण शाखाका अधिकृत भीष्मराज भट्टराईले बताए । नयाँ अनुमति लिने र छिटपुट आरोहीहरू ३१ मेसम्म सगरमाथा चढ्ने क्रम जारी रहनेछ ।
सगरमाथा आरोहणका लागि अहिलेसम्म नेपालसहित ५८ देशका तीन सय १७ आरोहीले अनुमति लिएका छन् । वसन्त ऋतुका लागि अझै आरोहणको अनुमति लिने क्रम जारी नै छ । विभिन्न मुलुकबाट आएका आरोहीलाई चुचुरोसम्म पुर्याउन शेर्पालगायत सहयोगी कर्मचारीहरू पनि शिखरसम्म पुग्ने गर्छन् ।
सन् २०२१ को वसन्त ऋतुमा सगरमाथा चढ्न विभिन्न देशका चार सय आठ आरोहीले अनुमति लिएका थिए, जसमध्ये एक सय ८३ आरोही र दुई सय ७६ सहयोगी कर्मचारी गरी चार सय ५९ सगरमाथा चुचुरोमा पुगेको विभागका अधिकृत भट्टराईले बताए । विभागका अनुसार आरोहणका सहयोगी दलले विभागबाट अनुमति लिनुपर्दैन । यस वर्ष हिमाल आरोहणका लागि मौसमले पनि साथ दिएको उनको भनाइ छ ।
विश्व कीर्तिमानी आरोही कामिरिता शेर्पासहित ११ जनाको टोलीले ७ मे (२४ वैशाख)को साँझ चुचुरोसम्म डोरी टाँगेर बाटो बनाएपछि यस सिजनको विधिवत् सगरमाथा आरोहण सुरु भएको थियो । कामिरिता शेर्पाले आफ्नो यसअघिको रेकर्ड तोड्दै २६औँपटक सगरमाथा चढेका छन् । यही सिजनमा लाक्पा शेर्पाले १०औँपटक सगरमाथा चढ्ने पहिलो महिलाको कीर्तिमानी बनाएकी छिन् ।
गायक राजु लामासाहित २७ जनाको टोली सोमबार बिहान ६:४० बजे सगरमाथाको चुचुरोमा पुगेका थिए । यस्तै, अश्वेत अल्पसंख्यक समुदायबाट ‘अल ब्ल्याक अमेरिकन’ टोली चुचुरोमा पुगेर अश्वेत समुदायबाट सामूहिक रूपमा सगरमाथा आरोहण गर्ने कीर्तिमान बनाएका छन् ।
‘फुल सर्कल एभरेस्ट’ नाम दिइएको पूरै अश्वेतहरूको टोलीबाट १० जनाले अनुमति लिए पनि गत बिहीबार ६ जना मात्रै शिखरमा पुग्न सफल भएको सांग्रिला नेपाल ट्रेक प्रालिका प्रबन्ध निर्देशक जीवन घिमिरेले बताए ।
यस सिजनमा सगरमाथा आरोहणका लागि ५८ देशका तीन सय १७ जनाले अनुमति लिएका छन्, जसमध्ये ७३ महिला छन् । सगरमाथा आरोहणका लागि अमेरिकाबाट ६५, बेलायतबाट ३४, रसियन फेडेरेसनबाट १७, नेपालबाट २१, भारतबाट २३, फ्रान्सबाट १३, चीनबाट १४, क्यानडाबाट १७, अस्ट्रेलिया र अस्ट्रियाबाट ११–११ जनाले अनुमति लिएका छन् । यीमध्ये धेरै चुचुरोमा पुगिसकेको र कतिपय विभिन्न शिविरबाट उकालो लागिरहेको पर्यटन विभागले जनाएको छ ।
