तीन जिल्लामा मात्र पाँच सयभन्दा बढी सक्रिय संक्रमित
नयाँ भेरियन्ट ओमिक्रोनले ल्याएको कोरोनाको तेस्रो लहरमा ५३ प्रतिशतसम्म पुगेको संक्रमणदर घटेर तीन प्रतिशतमा झरेको छ । ३८ दिनअघि ५ माघमा संक्रमणदर हालसम्मकै उच्च ५२.६ प्रतिशत पुगेकोमा पछिल्लो २४ घन्टाको संक्रमणदर तीन प्रतिशत मात्रै देखिएको हो ।
शनिबार पाँच हजार एक सय ५२ नमुना परीक्षण गरिएकामा एक सय ५५ मा मात्रै संक्रमण पुष्टि भएको छ । संक्रमण बिस्तारै सामान्य अवस्थामा फर्किँदै गएको छ । सक्रिय संक्रमितको संख्या पनि आठ हजार आठ सय ३९ मा झरेको छ ।
स्वास्थ्य मन्त्रालयका अनुसार अहिले काठमाडौं, ललितपुर र कास्की तीन जिल्लामा मात्रै पाँच सयभन्दा बढी सक्रिय संक्रमित छन् । काठमाडौंमा सबैभन्दा धेरै १६ सय ४९ र ललितपुरमा ११ सय १५ संक्रमित छन् । त्यस्तै, दुई सयभन्दा बढी संक्रमित हुनेमा प्रदेश १ का मोरङ र सुनसरी, मधेसको धनुषा, बागमतीको चितवन, लुम्बिनीका बाँके र रुपन्देही तथा सुदूरपश्चिमको कैलालीमा मात्र छन् । शनिबार ३७ जिल्लामा मात्र नयाँ संक्रमित देखिएका छन् ।
विश्वमै संक्रमण तीव्र घटिरहेको छ । जोन हप्किन्स विश्वविद्यालयको तथ्यांकअनुसार विश्वका अधिकांश देशमा दैनिक संक्रमणदर पाँच प्रतिशतभन्दा कम छ । संक्रमणदर शून्यमै झर्ने चिकित्सकहरूको दाबी छ । सामान्यतया सक्रिय संक्रमितको संख्या पाँच सयभन्दा कम भएमा महामारी सकिँदै गएको संकेत मान्न सकिने विश्व स्वास्थ्य संगठनले बताएको छ ।
कुल जनसंख्याको ५९.५ प्रतिशतले लगाए पूर्ण खोप
नेपालमा कुल जनसंख्याको ५९.५ प्रतिशतले कोरोनाविरुद्धको पूर्ण मात्रा खोप लगाएको स्वास्थ्य मन्त्रालयले जनाएको छ । लक्षित वर्गअन्तर्गत वयस्कमा ७८.५ प्रतिशतले पूर्ण र ९१.४ प्रतिशतले एक मात्रा खोप लगाएको मन्त्रालयको तथ्यांक छ । त्यस्तै, बालबालिकामा ४६ प्रतिशतले पूर्ण मात्रा र ८९ प्रतिशतले एक मात्रा लगाएका छन् ।
हालसम्म तीन करोड ६९ लाख ४३ हजार दुई सय ४२ डोज खोप प्रयोगमा आएको स्वास्थ्य मन्त्रालयको रिपोर्ट छ । शनिबार मात्रै एक लाख २९ हजार एक सय १९ डोज खोप प्रयोग भएको छ । पछिल्ला दिन दैनिक खोप लगाउनेको संख्या एक लाखभन्दा बढी भएकाले लक्षित वर्गमा खोप लगाउन बाँकी न्यून हुँदै गएको मन्त्रालयका अधिकारीहरूले जनाएका छन् ।
