अखिल नेपाल फुटबल संघ (एन्फा)ले नेपाल र मोरिससबीचको दुर्ई मैत्रीपूर्ण खेलमा दर्शककै उपस्थितिमा गर्ने भएको छ । एन्फाले मंगलबार विज्ञप्ति जारी गर्दै दुई खेलमा दर्शकलाई दशरथ रंगशालामा प्रवेश गर्न दिने जानकारी दिएको हो ।
तर, रंगशालाको एकतिहाइ सिट मात्रै दर्शकले भरिने छन् । रंगशालाको कुल सित क्षमता १६ हजार पाँच सय रहेको छ । एकतिहाइले मात्र अनुमति पाउँदा पाँच हजार दर्शकले रंगशालामा प्रवेश पाउनेछन् । नेपाल र मोरिससबीच आगामी शनिबार र मंगलबार खेल हुनेछ । खेल दिउँसो ४ः४५ बजे सुरु हुनेछ । एन्फाले स्वास्थ्य मापदण्ड अपनाएर मात्रै दर्शकलाई भित्र प्रवेश गराउनेछ । विश्व स्वास्थ्य संगठन तथा स्वास्थ्य मन्त्रालयले जारी गरेको कोभिड–१९ स्वास्थ्य सुरक्षा मापदण्ड पालना गरी दर्शकले फुटबल खेल हेर्न सक्ने छन् ।
एन्फाले खेल हेर्नका लागि दर्शकलाई खोप कार्ड पनि अनिवार्य गरेको छ । यसैबीच एन्फाले टिकट मूल्यसमेत सार्वजनिक गरेको छ । एन्फाका अनुसार रंगशालाको भिआइपीतर्फ एक हजार र साधारणतर्फ पाँच सय रुपैयाँ राखेको छ ।
मोरिससका चार खेलाडी संक्रमित
नेपाली राष्ट्रिय फुटबल टोलीविरुद्ध मैत्रीपूर्ण खेल खेल्न सोमबार नेपाल आएको मोरिससका चार खेलाडीमा कोरोना संक्रमण देखिएको छ । नेपाल आएपछि गरिएको परीक्षणमा चार खेलाडीमा संक्रमण देखिएको हो ।संक्रमित हुने खेलाडीहरू लोइस मिसेल, वाल्टर सेन्ट मार्टिन, केल्र्सन अगाथे र हान्स पटाटे छन् । संक्रमित सबैको स्वास्थ्य अवस्था सामान्य रहेको र हाल आइसोलेसनमा रहेको मोरिसस टोलीले जनाएको छ ।
मोरिससको टोलीमा दुईजना गोलरक्षक छन् । यसमध्ये एक गोलरक्षक लोइस मिसेल संक्रमित छन् । शनिबार हुने पहिलो खेलमा केभिन ओब्राएन जान लुइसले मात्र गोलपोस्ट सम्हाल्ने छन् । नेपालले हालसम्म मैत्रीपूर्ण खेल खेल्ने टोली घोषणा गरेको छैन । यद्यपि, प्रशिक्षक अब्दुल्लाह अलमुताइरीले एक सातादेखि सातदोबाटोस्थित एन्फा कम्प्लेक्समा खेलाडीहरूलाई नियमित प्रशिक्षण दिइरहेका छन् ।
प्रशिक्षक अलमुताइरीले प्रारम्भिक छनोटमा परेका ३४ खेलाडीलाई नै प्रशिक्षण दिइरहेका छन् । फिफा वरीयतामा नेपालभन्दा मोरिसस तीन स्थानले पछाडि छ । फिफाको पछिल्लो वरीयतामा नेपाल १६९औैँ र मोरिसस १७२औँ स्थानमा छ । नेपालले पहिलोपटक अफ्रिकी टोलीसँग अन्तर्राष्ट्रिय खेल खेल्न लागेको हो । मोरिससको पनि यो दुई वर्षपछिको अन्तर्राष्ट्रिय खेल हो । कोरोना महामारीका कारण टोलीले पछिल्लो समय अन्तर्राष्ट्रिय खेल खेलेको थिएन । नेपालले भने गत अक्टोबरमा माल्दिभ्समा भएको दक्षिण एसियाली फुटबल च्याम्पियनसिपछि अन्तर्राष्ट्रिय खेल खेल्न लागेको हो । यसअघि गत भदौमा नेपालले दशरथ रंशगालामै भारतविरुद्ध दुई मैत्रीपूर्ण खेल खेलेको थियो ।
