गत साता कारोबारका लागि तीन दिन मात्रै खुलेको बजारमा नेप्से परिसूचक भने एक सय ५८ अंकले घटेको छ । लगातार कारोबार दिनमा नेप्से ओरालो लागेर दुई हजार ६ सय ९० मा आइपुगेर बजार बन्द भएको छ ।
सातामा १६ अर्ब रुपैयाँको कारोबार भएको छ । औसत दैनिक कारोबार रकमका आधारमा यो घटेको छ । अघिल्लो साता चार कारोबार दिनमा दैनिक औसत सात अर्ब पाँच करोड रुपैयाँको सेयर किनबेच भएकोमा गत साता यस्तो औसत पाँच अर्ब ३५ करोड रुपैयाँ छ । यो २४ प्रतिशतले कम हो ।
बजारलाई बैंकिङ प्रणालीमा देखापरिरहेको तरलता अभावले प्रभाव पारेको छ । स्रोत अभाव भएसँगै बैंकहरूले सेयर धितो कर्जामा समेत कडाइ गरिरहेका छन् । सेयर बजारको विषय नउठे पनि शुक्रबार मात्रै अर्थमन्त्री र बैंकरबीचको छलफलमा समेत अर्थ मन्त्रालयले बैंकहरूलाई कृषिलगायतका उत्पादनमूलक क्षेत्रमा कर्जा लगानी गर्न निर्देशन दिएको छ ।
अर्कोतर्फ हालसम्म बजारमा सूचीकृत ९१ कम्पनीको लाभांश घोषणा भइसकेको छ । यसमा ४३ वटाको बुक क्लोज हुन र मिति तोक्न बाँकी नै छ । औसतमा करिब ३० प्रतिशत हाराहारी लाभांश प्रस्ताव भएको देखिन्छ । लघुवित्त, युनिलिभर र म्युचुअल फन्डहरू अलग्याउँदा पनि लाभांश दर औसतमा १६ प्रतिशत देखिएको छ । यसले पनि बजारमा लाभांशको बुक क्लोज हुन बाँकी कम्पनीहरू होल्ड गर्नु बुद्धिमानी नै हुने देखिन्छ ।
प्राविधिक विश्लेषण
बजारको प्रवृत्ति भने द्विविधाको अवस्थामै छ । अल्पकालीन प्राविधिक विश्लेषणको औजार मैनबत्ती चित्रका आधारमा बजारमा बियरिस प्रवृत्ति कायमै रहेको संकेत गर्छ । मुख्यतः अन्तिम दुई दिनमा कालो मैनबत्ती आकृति बनेको छ । अन्तिम दिनको आकृति केही सानो छ । यसले बजार घट्ने प्रवृत्तिमा केही रोकिने संकेत देखिए पनि प्रवृत्ति परिवर्तनबारे स्पष्ट भइनसकेको संकेत गर्छ ।
नेप्सेको आरएसआई सूचक स्केल ६५ दशमलव ९८ मा आएको छ । यसले बजारमा माग र आपूर्ति सन्तुलनमा रहेको देखाउँछ । यो सूचक स्केल ३० मुनि भए बजारमा अधिक बिक्री रहेको, ३० देखि ७० सम्म रहे बजार सन्तुलित र ७० माथि भए बजारमा अधिक खरिद रहेको विश्लेषण गरिन्छ ।
नेप्सेको सातदिने मुभिङ एभरेज रेखाले २१ दिने रेखालाई काटेर माथि लाग्ने प्रयासमा देखिन्छ । यसले बजार बुलिस प्रवृत्तिमा प्रवेश गर्न लागेको जस्तो देखिन्छ । यद्यपि, केही समय पर्खनु सही हुन्छ । यसमा चाँडो–चाँडो प्रवृत्ति परिवर्तन भइरहेकाले पनि यसलाई ध्यान दिनुपर्नेछ ।
पिभट विश्लेषणले भने आगामी साता दुई हजार ६ सय ३१ मा पहिलो टेवा प्रप्त गर्न सक्ने र यसले बजार बढ्न थालेमा भने दुई हजार आठ सय ६ मा पहिलो प्रतिरोध देखिएको छ ।
