टेस्ट तथा एकदिवसीय मान्यताप्राप्त आयरल्यान्डमाथि आठ विकेटको सनसनीपूर्ण जित निकाली नामिबियाले आइसिसी पुरुष टी–२० विश्वकपको सुपर १२ मा स्थान पक्का गर्यो
नामिबिया आइसिसी पुरुष टी–२० विश्वकपको सुपर १२ मा पुगेको छ । टी–२० विश्वकपअन्तर्गत पहिलो चरणको समूह ‘ए’मा नामिबियाले शुक्रबार आयरल्यान्डलाई आठ विकेटले हराउँदै सुपर १२ को स्थान पक्का गरेको हो । यससँगै नामिबियाले अर्को वर्ष अस्ट्रेलियामा हुने टी–२० विश्वकपमा समेत स्थान सुरक्षित गरेको छ । समूह ‘ए’मा नामिबिया चार अंकका साथ उपविजेता बन्यो । यस समूहमा श्रीलंकाले सर्वाधिक ६ अंक जोडेको छ । श्रीलंका समूह ‘ए’बाट सुपर १२ मा पुग्ने पहिलो टोली बनेको थियो । अब नामिबियाले भारत, पाकिस्तान, न्युजिल्यान्ड, स्कटल्यान्ड र अफगानिस्तान रहेको समूहमा प्रतिस्पर्धा गर्नेछ ।
आयरल्यान्डको मध्यम योगफल
समूह ‘ए’बाट सुपर १२ को आशा जीवितै राख्न आयरल्यान्डलाई जित आवश्यक थियो । प्रतिस्पर्धामा उत्रिनुअघि आयरल्यान्ड र नामिबियाले समान दुई अंक बटुलेका थिए । यो खेलको विजेता नै सुपर १२ मा पुग्ने थियो । टेस्ट तथा एकदिवसीय मान्यताप्राप्त आयरल्यान्डले सारजहाँ रंगशालामा सोचेको जस्तो ब्याटिङ गर्न सकेन । नामिबियाका बलरले उत्कृष्ट बलिङ प्रदर्शन गर्दा पहिलो ब्याटिङ गरेको आयरल्यान्डले २० ओभरमा आठ विकेटको नोक्सानीमा एक सय २५ रन मात्र जोड्यो ।
प्रत्युत्तरमा नामिबियाले १८.३ ओभरमा केवल दुई विकेटको नोक्सानीमा एक सय २६ रन बनाउँदै आयरल्यान्डमाथि सनसनी जित मात्र दर्ता गरेन, विश्वकपको सुपर १२ मा समेत स्थान सुरक्षित ग¥यो । नामिबियाको ऐतिहासिक जितमा डेभिड विएसे र गेर्हाड इरास्मुसले तेस्रो विकेटका लागि नटआउट ५३ रनको साझेदारी गरेका थिए ।
डेभिडले १४ बलमा दुई छक्का र एक चौकाको सहयोगमा २८ रन जोडे । इरास्मुसले ४९ बलमा तीन चौका र एक छक्काको सहयोगमा ५३ रनको अर्धशतकीय इनिङ खेले । यी दुवैले ७३–२ को अवस्थाबाट तेस्रो विकेटका लागि साझेदारी गरेका हुन् । दुवैले ५.१ ओभर ब्याटिङ गर्दा १०.२५ रनरेट राखेका थिए ।
शीर्ष तीन ब्याट्सम्यान मात्र चले
आयरल्यान्डको ब्याटिङ इनिङ्समा तीनजना शीर्ष ब्याट्सम्यान मात्र चले । यसबाहेक अन्य सातजना ब्याट्सम्यानले दोहोरो रनसमेत बनाउन सकेनन् । ओपनर पाउल स्टेर्लिङ र केभिन ओ ब्रायनले पहिलो विकेटका लागि ७.२ ओभरमा ६२ रनको बलियो साझेदारी गरे । यी दुईको साझेदारीमा नामिबियाले चुनौतीपूर्ण लक्ष्य पाउने अनुमान गरिएको थियो । तर, पाउलको विकेट स्चोल्टजले लिएपछि नामिबिया खेलमा फर्कियो ।
पाउलले २४ बलमा पाँच चौका र एक छक्का प्रहार गरी ३८ रनको योगदान दिए । इनिङ्सको ८.४ ओभरमा दोस्रो ओपनर केभिनको विकेट फयाक्लिनले लिए । केभिनले २४ बलमा दुई चौका प्रहार गरी २५ रन बनाए । कप्तान एन्ड्य बाब्रिनेले २१ रन जोडे । नामिबियाका बलरले कसिलो बलिङ गरेका कारण नै आयरल्यान्डका चौथो क्रमपछिका ब्याट्सम्यानले रन जोड्न निकै मिहिनेत गर्नुपरेको थियो । फयाक्लिनले २१ रन खर्चेर आयरल्यान्डका तीन ब्याट्सम्यानलाई आउट पारे । यसैगरी, डेभिड विएसेले २२ रनमा दुई विकेट लिए ।
नेदरल्यान्ड्स ४४ रनमा अलआउट
विश्वकपअन्तर्गत पहिलो चरणको समूह एमा नेदरल्यान्ड्स आफ्नो अन्तिम खेलमा श्रीलंकासँग आठ विकेटले पराजित भएको छ । पहिलो ब्याटिङ गरेको नेदरल्यान्ड्स ४४ रनमै अलआउट भएको थियो । श्रीलंकाले ७.१ ओभरमा दुई विकेटको क्षतिमा ४५ रन जोड्दै सानदार जित निकाल्यो । श्रीलंकाका लागि कुसल परेराले सर्वाधिक ३३ रनको योगदान दिए । उनले २४ बलमा ६ चौका प्रहार गरे । यसअघि ब्याटिङ गरेको नेदरल्यान्ड्का लागि कोलिन अकेरामले मात्र सर्वाधिक ११ रन जोडेका थिए । बलिङमा श्रीलंकाका लागि लहिरू कुमारा र हसारांगा सिल्भाले समान तीन–तीन विकेट हात पारे ।
सकिवको अलराउन्ड प्रदर्शन
अलराउन्डर सकिव उल हसनको अलराउन्ड प्रदर्शनको मद्दतमा बंगलादेशले आइसिसी पुरुष टी–२० विश्वकप क्रिकेट प्रतियोगिताको सुपर १२ स्थान सुरक्षित गरेको छ । समूह ‘बी’मा स्कटल्यान्डसँग स्तब्ध भएको बंगलादेशले त्यसपछिका लगातार दुई खेलमा जित निकाली पहिलो चरण पार गरेको हो । समूह ‘बी’को आफ्नो अन्तिम खेलमा बंगलादेशले पपुवा न्युगिनीमाथि ८४ रनको फराकिलो अन्तरले जित निकालेको हो ।
समूह ‘बी’मा बंगलादेशले तीन खेलबाट सर्वाधिक चार अंक जोडेको छ । लगातार तीन हारसँगै पपुवा न्युगिनी समूह चरणबाटै बाहिरिएको छ । ओमानको अल इमेरातमा पहिलो ब्याटिङ गरेको बंगलादेशले निर्धारित २० ओभरमा सात विकेट गुमाएर एक सय ८१ रनको योगफल खडा गरेको थियो । प्रत्युत्तरमा पहिलोपटक विश्वकप खेलिरहेको पपुवा न्युगिनी १९.३ ओभरमा ९७ रनमै समेटियो ।
उनले ब्याटिङमा ३७ बलमा ४६ रन जोड्दा तीन छक्का प्रहार गरे । बलिङमा सकिवले नौ रन मात्र खर्चेर चार विकेट लिए । पपुवा न्युगिनीका लागि आठौँ नम्बरका ब्याट्सम्यान किल्पिन डोरिगाले सर्वाधिक ४६ रनको योगदान दिए ।
