अमेरिकाको डियर एन्ड कम्पनीको सहायक कम्पनी जोन डियर इन्डिया प्रालिको आधिकारिक विक्रेता विवेक अटोमोबाइल्स प्रालिले ५० एचपी फोर–ह्विल ड्राइभ नयाँ ट्याक्टर बजारमा ल्याएको छ । कम्पनीले अत्याधुनिक प्रविधिसहितको विभिन्न विशेषता भएको हुनाले किसान समुदायको उत्पादकत्व बढाई आम्दानी बढाउने विश्वासका साथ नयाँ ट्याक्टर बजारमा ल्याएको हो ।
ट्याक्टर सार्वजनिक गर्न आयोजित समारोहमा कम्पनीको १०औँ हजार ट्याक्टर नेपाली उपभोक्तालाई हस्तान्तरण गरिएको कम्पनीले जनाएको छ । समारोहमा जोन डियर इन्डियाका बिक्री तथा मार्केटिङ निर्देशक सत्यन शाहले किसान उपभोक्ता तथा नेपालका लागि विवेक अटोमोबाइल्ससँगको लामो सहयात्रा ऐतिहासिक क्षण भएको बताए ।
जोन डियर संसारभरिको किसान समुदायका लागि उसको कृषि उत्पादकत्व र आय बढाउन प्रविधिको रूपमा उत्कृष्ट उत्पादन र सेवा दिन प्रतिबद्ध रहेको कम्पनीको दाबी छ । जोन डियरले कृषि शृंखला एकीकृत समाधान प्रदान गरेर विश्वकै धेरै क्षेत्रमा कृषि पद्घतिको आधुनिकीकरणमा नेतृत्व गरिरहेको जनाएको छ ।
