इपिएल : काठमाडौंको विजयी सुरुवात

काठमाडौंबाट छैटौँ ओभरमा बलिङ गर्न गएका सहिद अफ्रिदीले व्यक्तिगत पहिलो ओभरमै छक्काको सामना गरे, लक्ष्य पछ्याएको इनिङ्समा पनि उनले ब्याटिङको अवसर नै पाएनन्

आजको खेल
पहिलो खेलमा विराटनगर वारियर्स र चितवन टाइगर्स (बिहान ९:३० बजे)
दोस्रो खेलमा भैरहवा ग्लाडियटर्स र पोखरा राइनोज (दिउँसो १३:३० बजे)

काठमाडौं किंग्स इलाभेनले शनिबारदेखि सुरु भएको चौथो एभरेस्ट प्रिमियर लिग (इपिएल)मा साबिक विजेता ललितपुर प्याट्रियट्र्सलाई सात विकेटले हराउँदै उत्कृष्ट सुरुवात गरेको छ । त्रिवि क्रिकेट मैदानमा पहिलो ब्याटिङ गरेको ललितपुरले २० ओभरमा आठ विकेट गुमाउँदै एक सय ५७ रनको योगफल बनाएको थियो । लक्ष्य पछ्याएको काठमाडौंले १४.२ ओभरमा तीन विकेटको क्षतिमा एक सय ६० रन जोड्दै जित हात पारेको हो । 

सन्दीप लामिछानेको कप्तानीमा रहेको काठमाडौंको सुरुवात अति नै कमजोर रह्यो । इनिङ्सको १.२ ओभरमा काठमाडौंले दुई विकेट गुमायो । ओपनर सुभाष खकुरेल शून्य र अमित श्रेष्ठ चार रनमा रनआउट भएका थिए । त्यसपछि अफगानी ब्याट्सम्यान रहमानुल्लाह गर्बज र जिम्बावेका रायन बुरलले तेस्रो विकेटका लागि १.२ देखि १०.१ ओभरसम्म विस्फोटक ब्याटिङ गर्दै ७६ रनको साझेदारी गर्दै जितको आधार बनाएका थिए । 

पवन सर्राफको ओभरमा छक्का प्रहार गर्ने चक्कर विकेटकिपर विराकोडीले स्टम्पिङ गरे । त्यसपछि रायन र राजु रिजालबीच चौथो विकेटका लागि ७२ रनको साझेदारी हुँदा काठमाडौंले ३४ बलअघि नै जित निकालेको थियो । रहमानुल्लाहले ३६ बलमा समान चार चौका र चार छक्का प्रहार गरी ५९ रनको योगदान दिए । म्यान अफ दी म्याच रायनले ३४ बलमा सात छक्का र तीन चौकाको सहयोगमा ७३ रन बनाए । राजु रिजाल १९ रनमा अविजित रहे । 

यसअघि ललितपुरका लागि पवनले ६१ रनको अर्धशतकीय इनिङ्स खेलेका थिए । इनिङ्सकै पहिलो बलमा कप्तान कुशल भुर्तेल शून्य रनमा आउट भए । कमजोर ब्याटिङ प्रदर्शन गरेको ललितपुरका पवन, योगेन्द्रसिंह कार्की र शंकर रानाले मात्र गतिलो योगदान दिए । पवनले ४४ बलमा पाँच चौका र चार छक्का प्रहार गरे । योगेन्द्रसिंह कार्कीले ३३ रन जोड्दा २० बलमा तीन छक्का प्रहार गरे । भुटानी खेलाडी मिक्यो दोर्जीले अविजित १७ रन र नारायण जोशीले १२ रन बनाए । 

काठमाडौंका जितेन्द्र मुखियाले चार विकेट लिए । रायन बुरल र गुलसन झाले दुई–दुई विकेट लिए । काठमाडौंका कप्तान लामिछाने र सहिद अफ्रिदीले विकेट लिन सकेनन् । यस जितसँगै काठमाडौंले पहिलो खेलमा २ अंक जोडेको छ । 

अफ्रिदीको ब्याटिङको पालो नै आएन 

दोस्रो इनिङ्समा काठमाडौंले लक्ष्य पछ्याएको थियो । पहिलो इनिङ्सजस्तै दर्शकले दोस्रो इनिङ्समा पनि एकजना खेलाडीको खुबै प्रतीक्षा गरेका थिए । काठमाडौंमा आबद्ध विश्व क्रिकेटका अलराउन्डर पाकिस्तानी पूर्वकप्तान सहिद अफ्रिदी सबैको प्रतीक्षामा थिए । प्रतिओभर आठ रननजिक रहेको लक्ष्य पार गर्दा अफ्रिदीले पनि ब्याटिङ गर्ने धेरैको विश्वास थियो ।

काठमाडौंका ओपनर सुवास खकुरेल र अमित श्रेष्ठ केवल तीन बलको अन्तरमा आउट हुँदा पेभेलियनबाट अब अफ्रिदी ब्याट्सम्यानका रूपमा आउलान् भन्ने धेरैको कल्पना थियो । बलिङमा खासै चामत्कारिक प्रदर्शन गर्न नसकेका अफ्रिदीले पक्कै पनि आफ्नो विस्फोटक ब्याटिङ शैलीमा चौका र छक्का प्रहार गरेको दृश्य हेर्न दर्शक व्यग्र प्रतीक्षामा थिए ।

तर, अफगानी ओपनर रहमानुउल्लाह गुर्बज र जिम्बावेका रायन बरलले आक्रामक शैलीमा ब्याटिङ गर्दा अफ्रिदी क्रिजमा आउनै पाएनन् । रहमानुउल्लाह आउट हुँदा काठमाडौंलाई जितका लागि ६८ रन आवश्यक थियो । यति वेलासम्म पनि सबैले अफ्रिदीकै आशा लगाएर बसेका थिए । राजु रिजाल र रायनले आवश्यक रन पूरा गर्दै काठमाडौंलाई सानदार जित दिलाए । दुई खेलमा मात्रै सहभागी हुन आएका अफ्रिदीले पहिलो खेलमा ब्याटिङ गर्न नपाउँदा दर्शक निराश बने । 

अफ्रिदीले दिए चार ओभरमा ३२ रन

काठमाडौंका कप्तान सन्दीप लामिछानेले पावर प्लेको समाप्तिसँगै अन्तर्राष्ट्रिय क्रिकेटका अनुभवी लेग स्पिनर बलर अफ्रिदीलाई छैटौँ ओभरमै बल दिए । तर, अफ्रिदीले स्तरअनुसार बलिङ गर्न सकेनन् । उनले आफ्नो व्यक्तिगत पहिलो ओभरमै छक्काको सामना गर्न पुगे । उनले पहिलो ओभरमा १४ रन दिँदा एक चौकासमेत व्यहोरे । आठौँ ओभरमा पुनः बलिङ गर्न आएका अफ्रिदीले यसपटक तीन रन मात्र दिएर कमब्याक गर्न कोसिस गरे ।

पहिलो स्पेलमा अफ्रिदीले १७ रन दिएपछि कप्तान सन्दीपले उनलाई आराम दिए । इनिङ्सको १४औँ ओभरमा अफ्रिदीले व्यक्तिगत तेस्रो ओभर फ्याँके । यसपटक उनले १० रन खर्चे । यो ओभरमा पनि उनले एक छक्का सामना गरे । १६औँ ओभरमा अफ्रिदीले अन्तिम स्पेल गरे ।

दर्शकले एक हातले बल क्याच लिए ५० हजार पुरस्कार
इपिएलमा दर्शकको उपस्थिति बढाउन र खेल रोमाञ्चक बनाउन आयोजकले नयाँ जुक्ति निकालेको छ । भाग्य बलियो वा दिन राम्रो भए खेल हेर्नुका साथै दर्शकले ५० हजार रुपैयाँ पुरस्कार पाउन सक्छन् । यस्तो कसरी ? ब्याट्सम्यानले लामो छक्का प्रहार गरेको बल दर्शकले एक हातले क्याच गरे अब आयोजकले ५० हजार रुपैयाँ पुरस्कार दिने भएको छ ।

त्रिवि मैदानमा शनिबारदेखि चौथो संस्करणको इपिएल सुरु हुँदा आयोजकले यस्तो आकर्षक योजना घोषणा गरेको हो । उद्घाटन खेलमा काठमाडौं किंग्स इलाभेन र साबिक विजेता ललितपुर प्याट्रियट्र्सबीचको खेलमा ब्याट्सम्यानले १९ पटक दर्शक बसेकै स्थानमा लामो छक्का प्रहार गरेका थिए । तर, कुनै पनि एक दर्शकले एक हातले बल समात्न भने सकेनन् । यद्यपि, दर्शकले क्याच लिने प्रयास नगरेका भने होइनन् । तर, ब्याट्सम्यानले प्रहार गरेको बल यति धेरै स्पिडमा थियो कि दर्शकको हातमा लागेर पनि फुत्कियो । 

क्रिकेटमा दर्शकको आगमन 
कोरोना भाइरसका कारण सरकारले नेपालभित्र हुने गरेको कुनै पनि राष्ट्रिय तथा अन्तर्राष्ट्रिय खेलकुद प्रतियोगितामा थोरै दर्शक राख्न निर्देशन दिएको छ । कोरोनाविरुद्ध स्वास्थ्य प्रोटोकल पालना गरी खेल हेर्न आग्रह गरेको छ । त्रिवि मैदानमा शनिबार भएको काठमाडौं र ललितपुरबीचको खेलमा यस्तो कुनै पनि प्रोटोकल मानेको भने देखिएन । अन्य वेलामा झैँ सहजै दर्शकले टिकट काटेर मैदानमा खेलको आनन्द उठाए । पहिलो दिन भएकाले दर्शकको उपस्थिति तीन हजारभन्दा बढी भएको आयोजकको अनुमान छ । आयोजकले इपिएलमा बिस्तारै दर्शकको क्रेज बढ्ने अनुमान गरेको छ ।