सिराहा प्रहरीले १० असारदेखि २२ असारसम्म १२ दिनको अवधिमा कर्तव्य ज्यानसहित विभिन्न मुद्दाका नौजना फरार प्रतिवादीलाई जिल्लाका विभिन्न ठाउँबाट पक्राउ गरेको छ । जिल्ला अदालतले कैद र जरिवानाको फैसला सुनाएका फरार प्रतिवादीहरूलाई पक्राउ गरी अदालतमा बुझाइएको प्रहरीले जनाएको छ ।
सिराहा जिल्ला अदालतले कर्तव्य ज्यानसहित विभिन्न नौ मुद्दामा ४६ वर्ष कैद र एक लाख २७ हजार पाँच सय रुपैयाँ जरिवाना सजायको फैसला सुनाएका फरार प्रतिवादीहरूलाई खोजतलासको क्रममा पक्राउ गरिएको सिराहा प्रहरीले जनाएको छ । ‘पक्राउ गरिएकाहरूलाई आवश्यक कारबाहीका लागि सिराहा जिल्ला अदालतमा बुझाइएको छ,’ जिल्ला प्रहरी कार्यालय सिराहाका प्रवक्ता प्रहरी नायव उपरीक्षक सुवास बुढाथोकीले बताए ।
प्रहरी नायव उपरीक्षक बुढाथोकीका अनुसार २० वर्ष कैद सजाय पाएका सिराहाको कल्याणपुर नगरपालिका– ८ मझौलियाका ५० वर्षीय ध्रुव महरा चमार, लेनदेन बिगो मुद्दामा ६ महिना कैद सजाय भएका सिराहा नगरपालिका– १२ का ५७ वर्षीय कारी मुखियालाई पक्राउ गरी अदालत बुझाइएको छ । ठगी मुद्दामा एक लाख रुपैयाँ जरिवाना फैसला सुनाइएका पर्साको वीरगन्ज महानगरपालिका– १६ का २५ वर्षीय राजन पटेललाई पक्राउ गरी अदालत बुझाइएको प्रहरी नायव उपरीक्षक बुढाथोकीले बताए ।
त्यस्तै, लागुऔषध (गाँजा) मुद्दामा दुई वर्ष कैद र १५ हजार रुपैयाँ जरिवानाको सजाय सुनाइएका गोलबजार नगरपालिका– २ लालपुरका ५७ वर्षीय जगदीश साह, चोरी मुद्दामा एक वर्ष कैद र १० हजार रुपैयाँ जरिवाना गरिएका बरियारपट्टि गाउँपालिका– ४ का २५ वर्षीय रोशनकुमार महतो, सवारी ज्यान मुद्दाअन्तर्गत दुई वर्ष कैद सजाय पाएका सुखीपुर नगरपालिका– १० का २२ वर्षीय आनन्दकुमार महतोलाई समेत पक्राउ गरी अदालतमा बुझाइएको उनले बताए ।
कर्तव्य ज्यान मुद्दामा ६ महिना कैद र पाँच सय रुपैयाँ जरिवाना गरिएका कर्जन्हा नगरपालिका– ३ बन्दीपुरका ४३ वर्षीय मो. ताहिर राइन, कर्तव्य ज्यान मुद्दाकै २० वर्ष कैद सजाय पाएका मिर्चैया नगरपालिका– १२ सिक्रोनका ७५ वर्षीय बिकरु महरालाई पनि अदालतलाई बुझाइएको प्रहरीले जनाएको छ । प्रहरीका अनुसार वैदेशिक रोजगार ठगी मुद्दामा पक्राउ गरिएका कल्याणपुर नगरपालिका– १ का ४५ वर्षीय रमेश महरालाई आवश्यक कारबाहीका लागि वैदेशिक रोजगार विभाग पठाइएको छ ।
