सुदूरपश्चिम प्रदेश सभाका एमालेका सात सांसदले पार्टीको निर्देशन पालना गरेर मुख्यमन्त्री त्रिलोचन भट्टको विपक्षमा मतदान गरेको जवाफ संसदीय दललाई बुझाएका छन् । संसदीय दलका नेता प्रकाशबहादुर शाहले सोधेको स्पष्टीकरणको जवाफ बुझाउँदै उनीहरूले बरु संसदीय दलबाट पार्टीको निर्देशन उल्लंघन भएको उल्लेख गरेका छन् ।
‘संसदीय दल पार्टीको अंग हो । संसदीय दलभन्दा माथि पार्टी हुन्छ । पार्टीले विपक्षमा मतदान गर्न निर्देशन गरेको अवस्थामा दलले पक्षमा मतदानका लागि ह्विप लगाउनु पार्टी निर्देशनको उल्लंघन हो भनेर स्पष्टीकरणको जवाफ बुझाएका छौँ,’ सांसद पठानसिंह बोहराले नयाँ पत्रिकासँग भने । सातैजनाले बुझाएको स्पष्टीकरणको जवाफमा संसदीय दल पार्टीको निर्णय मान्न बाध्य हुने उल्लेख छ ।
मुख्यमन्त्री भट्टले मंगलबार प्रदेश सभाबाट विश्वासको मत लिएका थिए । त्यसअघि मंगलबार बिहान बसेको एमाले संसदीय दलको बैठकले विश्वासको मतको पक्षमा मतदान गर्ने निर्णय गर्दै आफ्ना सांसदलाई ह्विप जारी गरेको थियो ।
एमालेको खनाल–नेपाल समूहका १७ जनाले पक्षमा मतदान गरेपछि मुख्यमन्त्रीले विश्वासको मत पाए । विश्वासको मतका लागि २७ मत आवश्यक पर्नेमा भट्टले आफ्नो पार्टीका १३ सहित ३० मत पाए । एमालेकै अध्यक्ष ओलीनिकट सातजनाले भने विश्वासको मतको विपक्षमा मतदान गरेका थिए । संसदीय दलको ह्विप उल्लंघन गरेको भन्दै दलका नेता शाहले विपक्षमा मतदान गर्ने सातैजना सांसदलाई २४ घन्टाभित्र जवाफ दिन भन्दै स्पष्टीकरण सोधेका थिए । स्पष्टीकरणको जवाफ अध्ययन गरेर कारबाही प्रक्रिया अगाडि बढाइने दलको कार्यालयले जनाएको छ ।
ओली समूहनिकट पठानसिंह बोहरा, नेपालु चौधरी, रतन थापा, लीलाधर भट्ट, गेल्बुसिंह बोहरा, माया तामाङ बोहरा र बलदेव रेग्मीले विश्वासको मतको विपक्षमा मतदान गरेका थिए । ५२ सदस्यीय प्रदेश सभामा एमालेका २४ सांसद छन् । तीमध्ये १७ जना खनाल–नेपाल समूह र सातजना ओली समूहनिकट हुन् । सरकारमा खनाल–नेपाल समूहका चार मन्त्री र तीन राज्यमन्त्री छन् ।
एमाले प्रदेश कमिटीले विश्वासको मतको विपक्षमा मतदान गर्न निर्देशन दिएको थियो । सरकारको समर्थनलाई लिएर एमालेभित्र विवाद उत्कर्षमा छ । एमाले स्थायी समितिले गत १० जेठमा सुदूरपश्चिम सरकारको समर्थन फिर्ता लिने निर्णय गरेको थियो । तर, त्यसलाई चुनौती दिँदै खनाल–नेपाल समूहको बहुमत रहेको संसदीय दलको बैठकले सरकारलाई दिएको समर्थन कायम राख्ने निर्णय १२ जेठमा ग¥यो । उक्त निर्णयपछि सरकारमा खनाल–नेपाल समूहबाट तीन मन्त्री र तीन राज्यमन्त्री थपिएका थिए ।
