होटेल सञ्चालकसहित तीनजनाविरुद्ध किटानी जाहेरी दर्ता, मदिरा सेवन गराई यौन दुर्व्यवहार गरेको प्रहरीको भनाइ
लोपोन्मुख राउटे समुदायकी युवतीमाथि यौनहिंसा गरेको आरोपमा तीनजनाविरुद्ध जिल्ला प्रहरी कार्यालय सुर्खेतमा जाहेरी दर्ता भएको छ । मदिरा सेवन गराई यौन दुर्व्यवहार गरेको भन्दै गुर्भाकोट नगरपालिकाका चमनसिंह घर्ती, भूपेन्द्र बुढा र होटेल सञ्चालक विनोद पुनविरुद्ध जाहेरी परेको हो ।
मानव ओसारपसार, यौन दुव्र्यवहार र जबर्जस्ती करणीको मुद्दा चलाउन किटानी जाहेरी परेको जिल्ला प्रहरी कार्यालयका डिएसपी रामप्रसाद घर्तीले बताए । घटनाबारे अनुसन्धान थालिएको उनले जानकारी दिए । सुर्खेतको गुर्भाकोट नगरपालिका–९ का स्थानीय युवा घर्ती, बुढा र होटेल सञ्चालक पुनले १९ र २३ वर्षकी राउटे समुदायका युवतीलाई होटेलमा लगेर मदिरा सेवन गराएर यौन दुव्र्यवहार गरेको प्रहरीले जनाएको छ ।
गुर्भाकोट नगरपालिका–९ बोटेचौरका ३५ वर्षीय चमनसिंह घर्ती, २४ वर्षका भूपेन्द्र बुढा र २९ वर्षका मिलन पुनले शनिबार राति राउटे युवतीमाथि यौन हिंसा गरेका हुन् । पुनले सञ्चालन गरेको बोटेचौरस्थित शुभकामना होटल तथा रेस्टुरेन्टमा मदिरा खुवाएर अश्लील भिडिओ बनाएको प्रहरीले जनाएको छ । सो भिडियो सार्वजनिक भएपछि प्रहरीले उनीहरूलाई आइतबार बिहान पक्राउ गरेको थियो ।
भिडियोमा एकजना पुरुष अर्धनग्न अवस्थामा राउटे युवतीसँगै ओछ्यानमा पल्टिएका छन् । ती पुरूषले एउटी युवतीलाई बहिनी र अर्कीलाई श्रीमती सम्बोधन गर्छन् । श्रीमती भनिएकी युवतीलाई उनले संवेदनशील अंगमा छोएका छन् । ती पुरुषले युवतीलाई बारम्बर गीत गाउन अनुरोध गरे पनि उनीहरूले आनाकानी गरेका छन् । नसामा रहेकी एक युवतीले ‘डिस्टर्ब भयो के दाइ जानु’ भनेकी छन् ।
राउटे बस्तीमा बाहिरी मानिस जान रोक
गुर्भाकोट नगरपालिका–११ स्थित राउटे समुदाय बसोवास गरिरहेको क्षेत्रमा सुरक्षा व्यवस्था कडा पारेर बाहिरी मानिसलाई जान रोक लगाइएको छ । दुई राउटे युवतीमाथि यौन दुर्व्यवहार भएको समाचार सार्वजनिक भएसँगै प्रहरीले राउटे बस्तीमा सुरक्षा कडा बनाएको हो ।
जिल्ला प्रशासन कार्यालयले बाहिरका व्यक्तिलाई राउटे बस्तीमा जान रोक लगाएको र राउटे युवतीमाथि यौन दुर्व्यवहारभएको भिडियो राउटे समुदायमा पुग्न नदिन बाहिरका मानिसहरूलाई राउटे बस्तीमा प्रवेश गर्न रोक लगाइएको जिल्ला प्रहरी कार्यालयका डिएसपी रामप्रसाद घर्तीले बताए ।
‘पछिल्लो घटनापछि राउटे बस्तीमा चहलपहल बढ्ने र भिडियो त्यो समुदायमा पुग्न सक्ने भएपछि अनाधिकृत व्यक्तिहरूलाई बस्तीमा जान रोक लगाएका हौँ,’ उनले भने, ‘राउटे बस्तीमा बाहिरका कसैलाई प्रवेश गर्न नदिन २२ जना प्रहरी परिचालन गरिएको छ ।’
दुई युवतीमाथि यौन हिंसा भएको समाचार सार्वजनिक भएपछि कर्णाली प्रदेशका मुख्यमन्त्री महेन्द्रबहादुर शाहीले राउटे मुखियालाई छलफलका लागि बोलाएका छन् । राउटे समुदायलाई आवश्यक सहयोग गर्न र पीडित युवतीको स्वास्थ्य जाँचका लागि अस्पताल पठाउने वातावरण बनाइदिन मुख्यमन्त्री शाहीले राउटे मुखियालाई बोलाएका हुन् ।
