नेपाली कांग्रेसका नेता गगन थापाले संसद् नभएको वेला असंवैधानिक सरकारले अवैधानिक तबरले जस्केलाबाट ल्याएको बजेटमा नेपालको ढुंगा, गिटी, बालुवा निकासी गरेर व्यापार घाटा न्यूनीकरण गर्ने कार्यक्रम घुसाएर आफ्नो असली अनुहार र घटिया सोच उजागर गरेको आरोप लगाएका छन् ।
बुधबार सामाजिक सञ्जालमार्फत नेता थापाले वातावरण र चुरे संरक्षणमा सरकार कति असंवेदनशील छ भन्ने यहीबाट प्रस्ट भएको बताए । यस्तो कार्य नीतिगत भ्रष्टाचार भएको भन्दै उनले आफ्नाहरूलाई पोस्न सरकार कुन हदसम्म गिर्छ भन्ने कुराको छर्लंग भएको उल्लेख गरे ।
चुरे क्षेत्र तहसनहस पारेर तराईलाई मरुभूमीकरण गर्न उद्यत् यस्ता प्रयत्नलाई विगतमा संसदीय समितिमा हुँदा पनि पटकपटक रोकेको भन्दै उनले यसपटक पनि सरकारको यो निर्णय रोकेरै छाड्ने दाबी गरे ।
अदालतको आदेश, संसदीय समितिका पटकपटकका निर्देशन र नागरिकको खबरदारीलाई अन्देखा गर्दै सरकारले जस्केलाबाट ल्याएको यो जनविरोधी कार्यक्रमलाई हामी जनप्रतिनिधिले प्रतिरोध गर्ने भन्दै थापाले आमजनता, सञ्चारजगत्, सचेत नागरिक समाज सबैलाई यसको प्रतिरोध गर्न आह्वान गरे ।
