अर्थमन्त्री विष्णु पौडेलले आगामी आर्थिक वर्षका लागि रासायनिक मल खरिद गर्न १२ अर्ब रुपैयाँ विनियोजन गरेको बताएका छन् । आगामी आर्थिक बर्षको बजेट सार्वजनिक गर्दै मन्त्री पौडेलले यस्तो बताएका हुन् । यो रकमले ६ लाख मेट्रिकटन मल खरिद गर्न सकिन्छ ।
चालू आवमा ११ अर्ब रुपैयाँ रासायनिक मलका लागि अनुदान विनियोजन भएको छ । यसबाट करिब पाँच लाख टन मल आयात भएको छ । आगामी तीन वर्षभित्र रासायनिक मलको कारखाना खोल्न आवश्यक बजेट विनियोजन भएको उनले बताए ।
त्यस्तै, अर्थमन्त्री पौडेलको गृहजिल्ला रुपन्देहीको पर्साघाटमा आधुनिक कृषि थोकबजार खोल्ने गरी बजेट विनियोजन गरिएको छ । यस्तो बजार देशभरकै सबैभन्दा आधुनिक र ठूलो हुने गरी अध्ययन भइरहेको छ । यसमा दातृ संस्थाहरूले समेत लगानी गर्ने सुनिश्चित भइसकेको छ ।
त्यस्तै, धानलगायत प्रमुख खाद्यबालीको उन्नत बिउ खरिद गर्ने किसानलाई स्थानीय तहबाटै ५० प्रतिशत अनुदान उपलब्ध गराउने उनले जानकारी दिए । कृषि प्राविधिक अध्ययन गरिरहेका तीन सय विद्यार्थीलाई इन्टर्नका रूपमा खटाउने उनले बताए ।
त्यस्तै, देशभित्रै जैविक मल कारखाना खोल्ने निजी क्षेत्रलाई ५० प्रतिशत अनुदान दिने र पाउडर दूध कारखाना खोल्न चाहने निजी क्षेत्रलाई ८० प्रतिशतसम्म पुँजीगत अनुदान उपलब्ध गराउने उनले बताए ।
उखु किसानलाई अनुदान उपलब्ध गराउन ८४ करोड रुपैयाँ विनियोजन गरिएको छ । यो रकम धेरै न्यून हो । यो वर्ष मात्रै एक अर्ब २७ करोड रुपैयाँ खर्च भएको थियो ।
