कोरोना संक्रमणको डरले आरपी मेडिकलको गेटमै शव छाडेर भागे आफन्त
धनुषामा कोरोना लक्षण देखिएका एक बिरामीको उपचार नपाएर मृत्यु भएको छ । धनुषाको मिथिला नगरपालिका स्थायी घर भएका, तर पछिल्लो केही वर्षदेखि बटेश्वर नगरपालिका–४ स्थित ससुरालीमा बस्दै आएका ४५ वर्षीय लोकबहादुर परियारको मंगलबार बिहान मृत्यु भएको हो ।
बन्धुप्रसाद बास्तोला प्रजिअ, धनुषा
अस्पतालमा बेड छैन भने त्यसको व्यवस्थापन गर्न सकिन्थ्यो वा बाहिरै राखेर उपचार गर्न सकिन्थ्यो । कुनै निजी अस्पताललाई नै भनेर केही गर्न सकिन्थ्यो होला । तर, यो विषयमा हामी कसैलाई थाहा भएन । परियारको अवस्थाबारे समयमै जानकारी भएन, दुःखद घटना भयो ।
चार/पाँच दिनदेखि रुघाखोकी तथा ज्वरो औषधि खाइरहेका परियारलाई सोमबार साँझ ८ बजेतिर श्वासप्रश्वासमा समस्या भएपछि उपचारका लागि जनकपुरको प्रादेशिक अस्पताल लगिएको थियो । अस्पतालमा आइसियू बेड खाली नभएको भन्दै फर्काइयो । परियारलाई राति नै स्थानीय जानकी हेल्थ केयरमा उपचारका लागि लगियो । परियारसँगै रहेका कुरुवाले उपचार गराउनुभन्दा पूर्व नै आइसियूमा राखेर उपचार गर्दा लाग्ने खर्चबारे जिज्ञासा राखे । उपचार महँगो रहेको भन्दै त्यहाँबाट परियारलाई जानकी हेल्थ केयर एन्ड शिक्षण अस्पतालनजिकै रहेको रामजानकी हस्पिटल लगियो । त्यहाँ पनि उपचार महँगो रहेको, आफूले त्यति महँगो उपचार गराउन नसक्ने भन्दै परियारले गाउँमै लिएर जान आग्रह गरेको एम्बुलेन्सचालक रामबाबु महतोले बताए ।
‘निजी अस्पतालमा उपचार गराउन पैसा थिएन र सरकारी अस्पतालमा बेड नभेटेपछि बिनाउपचार घर फर्के,’ चालक महतोले भने । जनकपुरमा कुनै अस्पतालमा भर्ना नभएपछि गाउँकै बटेश्वर बजारमा रहेको आरपी मेडिकल हलमा उपचारका लागि पुग्दा परियारको मृत्यु भइसकेको उनले बताए ।
‘परियारको अक्सिजन लेबल क्रमशः कम हुँदै गयो,’ उनले भने, ‘त्यसमा एमबुलेन्समा रहेको अक्सिजन लगाएर चेक गर्दा ४५ मात्रै थियो । अक्सिजनको अभावमा उनको मृत्यु भएको हो ।’ आरपी मेडिकल हलका सञ्चालक सुबोध साहले जनकपुरबाट फर्काएर ल्याएलगत्तै बिहानै बिरामीको मृत्यु भएको जानकारी दिए ।
बटेश्वर गाउँपालिकाकी उपाध्यक्ष प्रमिलादेवी महतोले घटनापछि मात्र आफूहरूलाई थाहा भएको बताइन् । उनले भनिन्, ‘कुनै प्रकारको समस्या भए जानकारी गराएको भए केही पहल गर्न सकिन्थ्यो । तर, यहाँ कसैले थाहा पाएनन् । मान्छेको ज्यान गइहाल्यो ।’
जनकपुर प्रादेशिक अस्पतालका मेसु प्रमोद यादवले परियारको मृत्युको विषयमा सञ्चारमाध्यमबाट मात्र खबर पाएको बताए । उनले भने, ‘राति परियारलाई उपचारका लागि आइसियूमा ल्याइएको थियो, तर त्यसमा ६/७ वटा बेड मात्रै छ, बेड नभएपछि हामीले बिरामीलाई बाहिर नै पठाउने गर्छौं ।’
धनुषाका प्रमुख जिल्ला अधिकारी बन्धुप्रसाद बास्तोलाले घटनापछि मात्रै आफूहरूले थाहा पाएको बताए । ‘अस्पतालमा बेड छैन भने त्यसको व्यवस्थापन गर्न सकिन्थ्यो वा बाहिर राखेर उपचार गर्न सकिन्थ्यो । कुनै निजी अस्पताललाई नै भनेर केही गर्न सकिन्थ्यो होला । तर, यो विषयमा हामी कसैलाई थाहा भएन,’ उनले भने, ‘परियारको अवस्थाबारे समयमै जानकारी भएन, दु:खद घटना भयो ।’ मृतकमा कोरोना लक्षण देखिएकाले नेपाली सेनाले शवको सोही गाउँमा व्यवस्थापन गरेको प्रजिअ बास्तोलाले बताए । मृतकको स्वाब संकलन गरिएको उनले बताए ।
