पछिल्लो २४ घन्टामा देशभर चार हजार आठ सय ९७ कोरोना संक्रमित देखिएका छन् भने १७ जनाको मृत्यु भएको छ । स्वास्थ्य मन्त्रालयका अनुसार बुधबार १३ हजार आठ सय ७९ जनाको पिसिआर परीक्षण गर्दा चार हजार सात सय ७४ जनामा संक्रमण देखिएको छ । त्यस्तै, विभिन्न नाकामा गरिएको नौ सय ५५ एन्टिजेन परीक्षणमा एक सय २३ जनाको पजिटिभ रिपोर्ट आएको छ ।
देशभर सक्रिय संक्रमितको संख्या ३० हजार दुई सय नौ पुगेको छ । उनीहरूमध्ये २७ हजार आठ सय ४५ जना होम आइसोलेसनमा र दुई हजार तीन सय ६४ जना संस्थागत आइसोलेसनमा उपचाररत छन् । अहिलेसम्म तीन लाख १२ हजार ६ सय ९९ जना संक्रमित भइसकेका छन् । त्यसमध्ये दुई लाख ७९ हजार दुई सय ७९ जना निको भएका छन् । अहिलेसम्म मृत्यु हुनेको संख्या तीन हजार दुई सय ११ पुगेको छ ।
बुधबार थपिएका संक्रमितमध्ये सबैभन्दा धेरै दुई हजार ४७ जना काठमाडौं उपत्यकाका छन् । काठमाडौंमा एक हजार चार सय ६४, ललितपुरमा तीन सय ५१ र भक्तपुरमा दुई सय ३२ जनामा संक्रमण देखिएको स्वास्थ्य मन्त्रालयले जनाएको छ । त्यस्तै, रुपन्देहीमा चार सय ३४ र बाँकेमा तीन सय २८ संक्रमित फेला परेका छन् । पछिल्लो २४ घन्टामा सात सय ७३ जना संक्रमणमुक्त भएको मन्त्रालयको तथ्यांक छ ।
स्वास्थ्य मन्त्रालयका अनुसार ७७ वटै जिल्ला संक्रमणको चपेटामा परेका छन् । एकदेखि दुई सयसम्म संक्रमित रहेका ११ जिल्ला छन् । त्यस्तै, दुईदेखि चार सय संक्रमित भएका नौ जिल्ला छन् । बाँकी जिल्लामा संक्रमितको संख्या चार सय नाघेको स्वास्थ्य मन्त्रालयको तथ्यांक छ । काठमाडौं उपत्यकाबाहेक मोरङ, पर्सा, चितवन, कास्की, दाङ, बाँके, रुपन्देही, सुर्खेत र कैलालीमा धेरै संक्रमण देखिएको छ ।
