कर्णाली प्रदेशका मुख्यमन्त्री महेन्द्रबहादुर शाहीले प्रधानमन्त्री केपी ओलीको कदम प्रतिगामी भएको बताएका छन् । मुख्यमन्त्री तथा मन्त्रिपरिषद्को कार्यालयमा आयोजित पत्रकार भेटघाट कार्यक्रममा मुख्यमन्त्री शाहीले प्रधानमन्त्री ओलीले गरेको प्रतिनिधिसभा विघटन प्रतिगामी, अलोकतान्त्रिक र असंवैधानिक भएको बताएका हुन् ।
प्रधानमन्त्रीले चालेको कदम असंवैधानिक भएका कारणले फिर्ता लिनुपर्ने मुख्यमन्त्री शाहीले बताए । ‘निष्पक्ष न्यायालयले शक्ति पृथकीकरणको सिद्धान्तअनुसार दुर्घटना हुनबाट रोक्नुपर्छ,’ उनले भने, ‘त्यसपछि मात्र देश पुनः सोही ठाउँमा आउँछ र पार्टीभित्रको विवाद पनि समाधान हुन्छ ।’
विगतमा देशमा रहेको अस्थिर राजनीति जनताले सही दिशातर्फ जान्छ भनेर नै नेकपालाई दुईतिहाइ मत दिएको र विगतको सत्ता–संघर्ष सकिने आस गरेकोमा प्रधानमन्त्रीले त्यसमा कुठराघात गरेको मुख्यमन्त्री शाहीले बताए । ‘यो देश बनाउन दश वर्ष लाग्छ । त्यसै आशामा जनताले नेकपालाई बहुमत दिएका हुन्,’ उनले भने, ‘भएको स्थिर व्यवस्थालाई हटाएर मध्यावधि निर्वाचनले देशको हित गर्दैन । त्यसले देशलाई अस्थिर बनाउँछ ।’
सरकार ढाल्ने–बनाउने खेलले नेपालको राजनीति खराब मोडमा गएको भन्दै उनले ओलीले भएको दुईतिहाइको बहुमतको सरकार विघटन गरेर मध्यावधि निर्वाचन हुन नसक्ने बताए । ‘सरकार बनाउने–ढाल्ने खेलले प्रधानमन्त्री, मुख्यमन्त्री, मन्त्रीहरू त बदलिएलान्,’ उनले भने, ‘तर, देश त बन्दैन । यसैमा चिन्ता सबैले गर्नुपर्छ ।’
मुख्यमन्त्री शाहीले कर्णाली प्रदेश सरकारका मन्त्रीहरू परिवर्तन हुने पनि बताए । ‘उपयुक्त समयमा कर्णालीमा मन्त्रीहरू फेरबदल हुन सक्छन्,’ उनले भने, ‘त्यस विषयमा अहिले पनि छलफल चलिरहेको छ ।’
