राष्ट्रिय सतर्कता केन्द्रले सिंहदरबार प्रवेश गर्ने कर्मचारीले तोकिएको पोसाक नलगाएको भन्दै चेकजाँच गरेको छ ।
सतर्कता केन्द्रले बुधबार सिंहदरबारको पूर्वी द्वारमा कर्मचारीहरूले पोसाक लगाए–नलगाएको सम्बन्धमा चेकजाँच गरेको हो ।
सतर्कता केन्द्रका प्रहरी नायब उपरीक्षक (डिएसपी) कृष्णप्रसाद अधिकारीले बिहान ९ बजेदेखि नै चेकजाँच गरिएको बताए ।
अधिकांश कर्मचारीले पोसाक नलगाएको पाइएपछि सचेत गराउन चेकजाँच गरेको अधिकारीले बताए ।
उनले सिंहदरबारभित्र काम गर्ने कर्मचारी र बाहिरबाट काम लिएर आउने कर्मचारी सबैले पोसाक लगाए–नलगाएको जाँच गरिएको बताए ।
अधिकांश कर्मचारीले पोसाक नलगाएको पाइएको पनि उनले जानकारी दिए ।
पोसाक नलगाउने कर्मचारीलाई सचेत गराई प्रवेश गर्न दिइएको पनि डिएसपी अधिकारीले बताए ।
सरकारी कर्मचारीले पोसाक भत्ताबापत रकम लिने, तर पोसाक नै नलगाउने गरेपछि अनुगमन गर्नुपरेको डिएसपी अधिकारीले बताए ।
अबदेखि नियमित रूपमा छड्के जाँच गरिने पनि उनले जानकारी दिए ।
