जिल्लामा एक हजार नौ सय ८० परिवारको फुसको छानो हटाइने, लाभग्राहीको तथ्यांक संकलन गर्न सुरु
विपन्न र आर्थिक अवस्था कमजोर भएका संखुवासभाका एक हजार नौ सय ८० परिवारको फुस (खर)को छानो हटाएर जस्तापाता लगाइने भएको छ । यसका लागि तथ्यांक संकलन सुरु गरिएको छ ।
नागरिकको आवास सुरक्षित बनाउने उद्देश्यले फुसको छानो हटाएर सरकारी अनुदानमा जस्तापाता उपलब्ध गराउन लागिएको हो । सहरी विकास मन्त्रालयले गरिब तथा विपन्न समुदायका लागि ‘सुरक्षित नागरिक आवास’ कार्यक्रमअन्तर्गत फुसको छानो हटाउने अभियान सुरु हुन लागेको सांसद राजेन्द्र गौतमले बताए ।
यसका लागि सांसद गौतमको संयोजकत्वमा सुरक्षित आवाससम्बन्धी समिति गठन भएको छ । समितिले भूगोल र जनसंख्याका आधारमा जिल्लाको १० वटै स्थानीय तहलाई संख्यासमेत छुट्याएको छ । जिल्लाको सबैभन्दा बढी जनसंख्या रहेको सदरमुकामको नगरपालिका खाँदबारी नगरपालिकामा तीन सय ४० र सबैभन्दा कम भोटखोला गाउँपालिकामा ६१ घरको खरको छानो फेरिने भएको छ ।
त्यस्तै, चैनपुर नगरपालिकामा तीन सय ६०, धर्मदेवी नगरपालिकामा एक सय ८६, पाँचखपन नगरपालिकामा दुई सय ४३, मादी नगरपालिका एक सय ७५ र चिचिला गाउँपालिकामा एक सय २९ परिवारको फुसको छानो हटाइनेछ । यस्तै, सिलिचोङ गाउँपालिकामा एक सय ७९, मकालु गाउँपालिकामा एक सय ४४ र सभापोखरी गाउँपालिकामा एक सय ६३ घरमा जस्तापाता लगाइनेछ ।
यसका लागि निवेदन दिन स्थानीय बासिन्दालाई आग्रह गरिएको छ । उनीहरूले वडा कार्यालयमा निवेदन दिन सक्नेछन् । केही वडामा निवेदन संकलन कार्य सकिएको छ भने केहीमा चलिरहेको छ । खाँदबारी नगरपालिका–४ का वडाध्यक्ष सजित राईले तीन सयको हाराहारीमा निवेदन आउने आकलन गरिएको बताए । त्यसैगरी, खाँदबारी नगरपालिका–५ का वडाध्यक्ष श्याम निरौलाले आफ्नो वडामा खरको छानोसम्बन्धी माग गरिएको निवेदन संकलन गर्ने काम सकिएको बताए ।
फुसको छानो हटाएर जस्तापाता फेर्न प्रतिघर ५० हजार रुपैयाँ संघीय सरकारले अनुदान रकम उपलब्ध गराउनेछ । सेवाग्राहीले पहिलो किस्तास्वरूप ३० हजार रुपैयाँ उपलब्ध गराइनेछ भने बाँकी रहेको २० हजार रुपैयाँ घर निर्माणका लागि जस्तापाता खरिद गरेको बिल भरपाई पेस गरिसकेपछि दिइनेछ । सहरी विकास मन्त्रालयले करिब एक अर्बबराबरको बजेटबाट देशभर २० हजार घरधुरीलाई सुरक्षित आवास उपलब्ध गराउने भएको छ ।
