१९ जनाको मृत्यु, काठमाडौं उपत्यकामा १५३१ नयाँ संक्रमित
सरकारले परीक्षण नबढाए पनि कोरोना भाइरस संक्रमितको संख्या भने दिनदिनै बढ्दै गएको छ । सोमबार थप दुई हजार चार सय ४० जनामा संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार पछिल्लो २४ घन्टामा १३ हजार सात सय ९१ वटा नमुना परीक्षण गर्दा दुई हजार चार सय ४० जनामा संक्रमण पुष्टि भएको हो । परीक्षण गरिएकामध्ये झन्डै १८ प्रतिशतमा कोरोना संक्रमण देखिन थालेको छ । लगातार चौथो दिन दुई हजारभन्दा बढी संक्रमित पुष्टि भएको मन्त्रालयले जनाएको छ । योसँगै देशभर संक्रमितको संख्या ८९ हजार दुई सय ६३ पुगेको छ ।
सोमबार एक हजार एक सय ३३ जना संक्रमित निको भएका छन् । योसँगै निको हुनेको संख्या पनि ६५ हजार दुई सय दुई पुगेको छ । त्यस्तै, सक्रिय संक्रमितको संख्या २३ हजार पाँच सय सात पुगेको छ । सक्रिय संक्रमितमध्ये संस्थागत आइसोलेसनमा ११ हजार एक सय ९१ जना र होम आइसोलेसनमा १२ हजार तीन सय १६ जना रहेका छन् । संक्रमितमध्ये दुई सय ४४ जना आइसियू र ४३ जनाको भेन्टिलेटरमा राखेर उपचार भइरहेको मन्त्रालयका प्रवक्ता डा. जागेश्वर गौतमले बताए ।
काठमाडौं उपत्यकामा पनि संक्रमितको संख्या तीव्र रूपमा बढिरहेको छ । सोमबार एक हजार पाँच सय ३१ जनामा कोरोना संक्रमण पुष्टि भएको छ । उपत्यकामा देखिएका संक्रमितमध्ये काठमाडौंमा एक हजार एक सय ७८, ललितपुरमा दुई सय ५० र भक्तपुरमा एक सय तीनजनामा संक्रमण देखिएको मन्त्रालयले जनाएको छ ।
कोरोनाबाट १९ जनाको मृत्यु
कोरोना भाइरसको संक्रमणबाट पछिल्लो २४ घन्टामा १९ जनाले ज्यान गुमाएका छन् । यो अहिलेसम्मकै सबैभन्दा बढी हो । उनीहरूमध्ये १२ जनाको काठमाडौंमै मृत्यु भएको हो ।
योसँगै कोरोनाबाट मृत्यु हुनेको संख्या पाँच सय ५४ पुगेको स्वास्थ्य तथा जनसंख्या मन्त्रालयले जनाएको छ । कोरोनाबाट ज्यान गुमाउनेमा काठमाडौंका नौ, ललितपुरका तीन, सर्लाहीका दुई पुरुष, सुनसरी, चितवन, नवलपरासी पूर्व, पर्सा र गोरखाका एक–एकजना रहेका छन् ।
