कोरोना भाइरस पत्ता लगाउन अब एन्टिजिन परीक्षण गरिने भएको छ । यसका लागि सरकारले बाटो खुला गरेको छ । आइतबार स्वास्थ्य तथा जनसंख्या मन्त्रालयले सबैले परीक्षण गर्न पाउने गरी निर्णय गरेको छ ।
निषेधाज्ञा जारी गर्दा पनि कोरोनाको संक्रमण नघटेपछि तत्काल परीक्षण गरी नतिजा हेर्न एन्टिजिन परीक्षण गर्ने निर्णय गरिएको जनाएको छ । स्वास्थ्य तथा जनसंख्या मन्त्रालयका प्रमुख विशेषज्ञ डा. रोशन पोखरेलले शरीरमा भाइरस कति छ भनेर हेर्न एन्टिजिन परीक्षण गर्ने निर्णय गरिएको बताए । उनकै पहलमा जापानले ५० हजार थान एन्टिजिन किट दिने भएको छ । आइतबार नै सात हजार थान एन्टिजिन किट जापानी कम्पनीले उनलाई हस्तान्तरण गरेको छ ।
¥यापिड डायग्नोस्टिकजस्तै एन्टिजिन किट भए पनि यसको परीक्षण प्रक्रिया फरक भएको अधिकारीहरू बताउँछन् । समुदायमा संक्रमित खोज्ने कार्यलाई तीव्रता दिन ¥यापिड डायग्नोस्टिक किट (आरडिटी)मार्फत रगतमा एन्टिबडी हेरिन्छ, तर एन्टिजिन किटबाट भने शरीरमा भाइरसको मात्रा कति छ भनेर हेरिन्छ । प्रमुख विशेषज्ञ डा. पोखरेलले भने, ‘एन्टिजिन'का माध्यमबाट भाइरसविरुद्ध शरीरले रोग प्रतिरोधात्मक क्षमता (एन्टिबडी) बनाएको हेर्न होइन, यसले शरीरमा भाइरस नै कति छ भनेर हेर्ने हो ।’
एन्टिजिन किटको प्रयोग गरेका देशमा प्रभावकारिता ९० प्रतिशतभन्दा माथि देखिएको स्वास्थ्य मन्त्रालयले जनाएको छ । एन्टिजिन हेर्न खकार र नाकबाटै स्वाब संकलन गरिन्छ । तर, यसका लागि परीक्षण पिपिआर मेसिनमा हाल्नुपर्दैन, छुट्टै किट हुन्छ । किटमा स्वाब हालेर घोलेको २० मिनेटभित्र नतिजा देखाउँछ । चिकित्सकहरूका अनुसार एउटा मात्रै धर्का देखाएमा त्यसलाई कोरोना नभएको मानिन्छ भने दुईवटा धर्का देखाएको खण्डमा पोजेटिभ भएको मानिन्छ ।
एन्टिजिनमार्फत स्वास्थ्यकर्मी, सुरक्षाकर्मी, क्वारेन्टाइनमा भएका व्यक्ति र शंका लागेर चाँडै परीक्षण गर्नुपरेको अवस्थामा प्रयोग गरिने डा. पोखरेल बताए । स्वास्थ्य मन्त्रालयका अनुसार एक हजारभन्दा कम मूल्यमा यसको परीक्षण हुनेछ ।
आइसियू र भेन्टिलेटरमा पुग्ने बढे
कोरोना संक्रमित बढेसँगै आइसियू र भेन्टिलेटरमा पुग्ने संक्रमितको संख्या पनि बढ्दो क्रममा छ । स्वास्थ्य तथा जनसंख्या मन्त्रालयको तथ्यांकअनुसार पछिल्लो २४ घन्टामा देशभर दुई सय एकजनाको आइसियू तथा भेन्टिलेटरको सहायतामा उपचार भइरहेको छ ।
१९ भदौमा २६ जना भेन्टिलेटरमा र एक सय एकजना आइसियूमा थिए । त्यस्तै, २० भदौमा २४ जना भेन्टिलेटरमा र एक सय ६७ जना आइसियूमा थिए । आइतबार भने २७ जना भेन्टिलेटरमा र एक सय ७४ जना आइसियूमा पुगेका छन् । पछिल्लो समय लक्षणसहितका संक्रमित बढ्दै गएका छन् भने समुदायस्तरमा पनि संक्रमण देखिन थालेको छ । जसले गर्दा आइसियू तथा भेन्टिलेटरमा पुग्ने पनि बढ्दै गएको जनाइएको छ ।
सरकारले कुल संक्रमितमध्ये पाँच प्रतिशत संक्रमित गम्भीर अवस्थामा हुने बताउँदै आएको छ । मन्त्रालयका अनुसार आइतबार देशभर नौ सय ८० जना नयाँ संक्रमित देखिएका छन् । योसँगै संक्रमितको संख्या ४६ हजार दुई सय ५७ पुगेको छ । आइतबार १० हजार तीन सय ८२ वटा नमुना परीक्षण भएको थियो । त्यस्तै, कोरोनाबाट नौजनाको ज्यान गएसँगै मृत्यु हुनेको संख्या दुई सय ८९ पुगेको छ । आइतबार मृत्यु हुनेहरू काठमाडौंका तीन, मोरङका दुई, झापा, धनुषा, पर्सा र चितवनका एक–एकजना छन् ।
वीर अस्पताललाई कोभिड बनाइयो
स्वास्थ्य तथा जनसंख्या मन्त्रालयले वीर अस्पताललाई कोभिड अस्पतालका रूपमा प्रयोग गर्ने निर्णय गरेको छ । वीर अस्पतालमा हुँदै आएका अन्य नियमित सेवा भने अब राष्ट्रिय ट्रमा सेन्टरबाट प्रदान गर्ने निर्णय भएको स्वास्थ्य प्रवक्ता डा. जागेश्वर गौतमले बताए । यसअघि वीर अस्पताललाई ननकोभिडका रूपमा प्रयोग गरिएको थियो । तर, संक्रमण बढ्दै गएपछि वीरमा पनि संक्रमित भर्ना भएका थिए । अहिलेसम्म वीर अस्पतालका ७५ जना स्वास्थ्यकर्मीसमेत संक्रमित भएका छन् ।
