कक्षा १२ को पूरक परीक्षा साउन २ र ३ गते हुने भएको छ । राष्ट्रिय परीक्षा बोर्डले जारी गरेको सूचनामा दुई दिन पूरक परीक्षा हुने जनाइएको छ । नियमित परीक्षार्थीका रूपमा सहभागी भई सैद्धान्तिकतर्फ अन्य सबै विषयमा ‘डी’ वा सोभन्दा माथिल्लो ग्रेड प्राप्त गरी बढीमा कुनै दुई विषयमा ननग्रेडेड प्राप्त गर्ने वा बढीमा दुई विषयमा अनुपस्थित रहेका परीक्षार्थीहरूले पूरक परीक्षामा सहभागी हुन पाउनेछन् ।
परीक्षा बिहान ११ बजेदेखि दिउँसो २ बजेसम्म सञ्चालन हुने बोर्डले जनाएको छ । शुक्रबार सार्वजनिक गरिएको नतिजामा एक लाख ४७१ जना विद्यार्थी ननग्रेड भएका छन् ।
नियमिततर्फ ६९.७५ विद्यार्थी ग्रेडेड भएका छन् । नियमितमा तीन लाख ३२ हजार २४१ जना परीक्षामा सहभागी भएका थिए । जसमा दुई लाख ३१ हजार ७७० जना ग्रेडेड भएका छन् ।
आंशिकतर्फ ८५ हजार ९२९ जना विद्यार्थी सहभागी भएका थिए । जसमा ३६ हजार ४२० जना ग्रेडेड भएका छन् । यो आंशिकतर्फ मात्र ४२.३८ प्रतिशत ग्रेडेड भएका छन् ।
समग्रमा नियमित र आंशिक गरी चार लाख १८ हजार १७० जना विद्यार्थीले परीक्षा दिएका थिए । परीक्षा ०८३ वैशाख १४ देखि २७ गतेसम्म सञ्चालन भएको थियो ।
