काठमाडौं महानगरपालिकाका वडाहरूमा सञ्चालन गरिएको प्राथमिक उपचार तालिममा १५१ जना प्रशिक्षित हुँदा ११४ जना महिला रहेका छन् ।
हरेक वडामा २५ जनालाई तालिम दिने लक्ष्यसहित चैत १५ गतेदेखि थालिएको तालिमअन्तर्गत अहिलेसम्म वडा नं. १, ९, १२, १४, १५ र २६ गरी ६ वटा वडामा सम्पन्न भएको छ ।
तालिम नेपाल रेडक्रस सोसाइटी काठमाडौं शाखासँगको सहकार्यमा गरिएको हो । यसका लागि ०८२ चैत ५ गते सम्झौता गरिएको थियो । सोसाइटीले ६ वटा वडामा सम्पन्न गरेको तालिमको समीक्षा गरेको छ । यस क्रममा रेडक्रस काठमाडौंका सभापति श्यामकाजी डोटेलले, तालिमका लागि ज्येष्ठ नागरिकहरूको बढी चासो आएको उल्लेख गरे ।
ज्येष्ठ नागरिकहरूको भनाइ उद्धृत गर्दै उनले भने, ‘टोलमा तन्नेरीहरू घट्दै छन् । हामीले यो सिप लिन पायौँ भने कम्तीमा बुढाले बुढीलाई र बुढीलाई बुढाले बचाउन सकिने रहेछ । हामी अरूलाई बचाउन जान सक्दैनौँ होला । तर, हामी आफूलाई त बचाउन सक्छौँ नि । के हामी बच्नुपर्दैन ?’
शाखाका कोषाध्यक्ष लक्ष्मी रत्न तुलाधरले, तालिम प्रभावकारी रूपमा सञ्चालन भएको जानकारी दिँदै यसअघिका तालिमभन्दा यसपटकको तालिम बढी प्रभावकारी रहेको महसुस भएको उल्लेख गरिन् । महानगरपालिकाका महामारी रोग रोकथाम तथा नियन्त्रण कार्यक्रमका फोकल पर्सन ऋषिप्रसाद भुसालका अनुसार यो सेवा आपतकाल व्यवस्थापनका लागि उपयोगी हुनेछ ।
समीक्षात्मक बैठकमा प्रशिक्षकहरू राजाराम श्रेष्ठ, पार्वती पुडासैनी, अमृता रिजाल, राजेन्द्र श्रेष्ठले अनुभव सुनाउँदै भने, ‘प्रशिक्षार्थीहरू कसैलाई पनि समयमा आउनु भन्नु परेको छैन । समय नसकिँदै जान कसैले हतार गर्नुहुन्न । धेरै गृहिणी हुनुहुन्छ । कोही पनि घरको काम बितेको छ भनेर हतारिनुहुन्न । जनप्रतिनिधिहरू पनि पूरा समय दिएर सिकिरहनुभएको छ ।’ यो सबैभन्दा सबल पक्ष हो ।
यसरी लिएको तालिमबाट प्राप्त गरेको प्रमाणपत्र नेपालसहित १९२ देशमा मान्य हुनेछ । तालिममा दुर्घटना, चोटपटक वा स्वास्थ्यजन्य आपतकालीन परिस्थितिमा आफूनजिक रहेका साधन तथा वस्तुको उपयोग अवस्था बिग्रिन नदिने, स्थिर बनाउने र सुधार गराउने सिप सिकाइन्छ । दुर्घटना, चोटपटक, अचानक बिरामी पर्ने अवस्थाजस्ता स्वास्थ्यजन्य आपत्कालीन परिस्थितिमा बिरामीलाई अस्पताल पुर्याउनु अघि अवस्था थप बिग्रिन नदिनु तालिम सञ्चालनको मुख्य उद्देश्य हो ।
यसका लागि घटना स्थल वरपर जे सामान तथा वस्तु पाइन्छ, त्यसैलाई प्रयोग गरेर जीवन बचाउने तथा अवस्था थप बिग्रिन नदिने वा उपचारका लागि अस्पताल लैजाने विधि सिकाइन्छ ।
