भर्खरै सम्पन्न प्रतिनिधिसभा निर्वाचनमा विभिन्न राजनीतिक दलबाट सात पूर्वसुरक्षाकर्मी चुनावी मैदानमा उत्रिएका थिए । शनिबार बेलुकासम्मको मतपरिणामअनुसार उनीहरूमध्ये दुईजनाले जित हासिल गरेका छन् भने एकजनाले हार व्यहोर्नुपरेको छ । बाँकी चार सुरक्षाकर्मीको मतपरिणाम भने आउन बाँकी छ ।
प्राप्त मतपरिणामअनुसार हालसम्म गोविन्द पन्थी र राजु पाण्डेले जित हासिल गरेका छन् । त्यस्तै, सर्वेन्द्र खनालले भने हार व्यहोर्नुपरेको छ । पन्थी राष्ट्रिय स्वतन्त्र पार्टी (रास्वपा)बाट गुल्मी २ बाट उम्मेदवार बनेका थिए । उनीसँग चुनावी मैदानमा एमालेबाट गोकर्ण विष्ट र कांग्रेसबाट भुवन श्रेष्ठलगायतका उम्मेदवार चुनावी मैदानमा उत्रिएका थिए । उनीहरूमध्ये पन्थी १६ हजार ९६७ मतसहित विजयी भएका छन् । उनको निकटतम प्रतिद्वन्द्वी एमाले उपाध्यक्ष गोकर्ण विष्टले १६ हजार ४०६ मत ल्याएका थिए । पन्थी नेपाल प्रहरीको अवकाशप्राप्त डिएसपी हुन् ।
रास्वपाकै तर्फबाट चुनावी मैदानमा उत्रिएका राजु पाण्डे पनि १८ हजार ७५७ मतसहित विजयी भएका छन् । उनका निटकतम प्रतिद्वन्द्वी कुलमान घिसिङले ११ हजार १७१ मत ल्याउन सके । काठमाडौं महानगरपालिकाको नगर प्रहरी प्रमुख पाण्डेले उम्मेदवारी दर्ता गर्नुअघि मात्रै पदबाट राजीनामा दिएका थिए । काठमाडौं ३ बाट चुनावी मैदानमा उत्रिएका उनी प्रस्तावित प्रधानमन्त्रीको दाबेदार बालेन्द्र शाह ‘बालेन’ निकट मानिन्छन् ।
एता नेपाल प्रहरीका पूर्वआइजिपी सर्वेन्द्र खनालले भने चुनावमा हार व्यहोरेका छन् । उनी बारा ४ बाट चुनावी मैदानमा उत्रिएका थिए । उक्त क्षेत्रबाट रास्वपाकै रहबर अन्सारीले ४१ हजार दुई सय मतसहित विजय हासिल गरेका छन् । दोस्रोमा एमाले उम्मेदवार कृष्णकुमार श्रेष्ठ ११ हजार ६३९ मत ल्याएका छन् । यसअघि काठमाडौं ६ र उपनिर्वाचनमा तनहुँ १ बाट उम्मेदवार बनेका उनले दुवै निर्वाचनमा हार व्यहोरेका थिए । संयोग कस्तो भने तीनवटै निर्वाचनमा हराउने रास्वपाका उम्मेदवार रहेका छन् । काठमाडौं ६ मा उनले शिशिर खनाल र तनहुँ १ मा डा. स्वर्णिम वाग्लेसँग हारेका थिए । दुवै निर्वाचनमा एमालेबाट चुनावी मैदानमा उत्रिएका उनले यसपटक भने आफ्नै नेतृत्वको समुन्नत पार्टी नेपाल खोलेका थिए ।
नवलपरासी पश्चिम १ बाट चुनावी मैदनमा उत्रिएका निवर्तमान सांसद ध्रुवबहादुर प्रधानले चार हजार ६९१ मतसहित चौथो स्थान हासिल गरेका छन् । नेपाल प्रहरीका पूर्वआइजिपी प्रधान राष्ट्रिय प्रजातन्त्र पार्टी (राप्रपा)का उम्मेदवार हुन् । उक्त क्षेत्रमा रास्वपा उम्मेदवार नरेन्द्र गुप्ताले ४५ हजार २४१ मत ल्याएर विजयी भएका छन् । दोस्राेमा कांग्रेस उम्मेदवार भीमबहादुर थापा क्षेत्री (१५,९४५) र तेस्रोमा जनता समाजवादी पार्टी नेपालका देवेन्द्र यादव (७,२१२) छन् ।
नेपाल प्रहरीका पूर्वएआइजी विश्वराज पोखरेल रास्वपाबाटै ओखलढुंगाबाट निर्वाचनमा उठेका थिए । उनी शनिबार बेलुकासम्म १३ हजार ९५३ मतसहित विजयी भएका छन् । उक्त क्षेत्रमा कांग्रेस उम्मेदवार कुमार लुइँटेलले १३ हजार ९४८ मत ल्याएका छन् । दुईबिच जितको अन्तर मात्रै पाँच मतको छ । सिनियर हुँदाहुँदै १६ महिना जुनियर एआइजी धीरजप्रताप सिंहलाई आइजिपी बनाएपछि पोखरेलले पदबाट राजीनामा दिएका थिए ।
कपिलवस्तु २ बाट चुनावी मैदानमा उत्रिएका नेपाल प्रहरीका पूर्वएसएसपी विक्रमसिंह थापाले २७ हजार ६३५ मतसहित जित हासिल गरेका छन् । उनी पनि रास्वपाबाट उम्मेदवार बनेका हुन् । उनको निटकतम प्रतिद्वन्द्वी कांग्रेस उम्मेदवार सुरेन्द्रराज आचार्यले २१ हजार ५२७ मत ल्याएका छन् । ०७९ को निर्वाचनका कांग्रेसबाट लुम्बिनी प्रदेश सभा उम्मेदवार बनेका उनी पछि रास्वपा प्रवेश गरेका थिए ।
झापा ४ बाट उम्मेवार बनेका शम्भु सुस्केरा भनिने शम्भुप्रसाद ढकालले ४३ हजार ६३१ मत ल्याएर जित हासिल गरेका छन् । रास्वपाबाट चुनावी मैदानमा उत्रिएका उनका निटकमत प्रतिद्वन्द्वी एमाले नेता एलपी साँवा हुन् । उनले ११ हजार ९८६ मत ल्याएका छन् । ढकाल नेपाल प्रहरीका पूर्वसइ हुन् । उनी रास्वपाका झापा सचिव हुन् । उनी ०७९ को निर्वाचनमा पनि सोही क्षेत्रबाट उम्मेदवार बनेका थिए । उनले त्यसवेला १४ हजार ६९ मत ल्याएका थिए । त्यसवेला साँवा २९ हजार ३१५ मत ल्याएर विजयी भएका थिए ।
