विभागद्वारा सात महिनामा एक सय ९६ मुद्दा अदालतमा दायर, १२ करोड १८ लाख ५३ हजार पाँच सय चार रुपैयाँ क्षतिपूर्ति दाबी
वैदेशिक रोजगार विभागले चालू आवको माघ मसान्तसम्म दुई सय १३ म्यानपावर कम्पनीको अनुगमन गरेर पौने तीन करोड क्षतिपूर्ति दिलाएको छ । विभागले विभिन्न देश जाँदा ठगिएको तथा दु:ख पाएको भन्दै कामदारले गरेको उजुरीका आधारमा एक सय ३२ म्यानपावरको अनुगमन गर्नुका साथै आकस्मिक अनुगमन पनि गरेको हो । उजुरीमध्ये ८१ वटाको किनारा लगाएको विभागमातहतको अनुगमन तथा अभिमुखीकरण शाखाले जनाएको छ ।
विभागको मुद्दा तथा अनुसन्धान शाखाले सात महिनामा १२ करोड १८ लाख ५३ हजार पाँच सय चार रुपैयाँ क्षतिपूर्ति दाबीसहित उजुरी परेको जनाएको छ । सोही उजुरीउपर कारबाही गर्दै दुई करोड ७१ लाख २३ हजार आठ सय चार रुपैयाँ क्षतिपूर्तिसमेत दिलाएको विभागको भनाइ छ । यस्तो क्षतिपूर्ति म्यानपावर कम्पनी तथा अभिमुखीकरण संस्थाहरूबाट पीडित कामदारलाई दिलाइएको हो ।
सात महिनामा गरिएको अनुगमनका क्रममा दुई म्यानपवारको कारोबार रोक्का राखिएको छ । त्यस्तै, दुईवटा अभिमुखीकरण गर्ने संस्थाको समेत कारोबार रोकिएको छ । म्यानपावरले जफत गरेको ४६ वटा राहदानी फिर्ता गरी सम्बन्धित व्यक्तिलाई समेत फिर्ता गरेको छ । विभागको मुद्दा तथा अनुसन्धान शाखाले गर्ने सुपरीक्षण प्रणालीमा सात महिनामा २९ सय ८७ उजुरी दर्ता भएका छन् । यसमध्ये माघमा मात्रै चार सय २६ उजुरी दर्ता भएका हुन् ।
त्यस्तै, सो शाखाले माघमा ७० सहित सात महिनामा कुल दुई सय ९५ मिलापत्र गराएको छ । म्यानपावरलाई कारबाहीका लागि मुद्दा दायर गर्न माग गर्दै दिएको उजुरीपछि कामदार र रजिस्ट्रर संस्थाका प्रतिनिधि बसेर विभागको रोहबरमा मिलापत्र गराउने गरिएको छ । मिलापत्र हुन नसकेको र ठगी पुष्टि भएको प्रमाणका आधारमा विभागले सात महिनामा एक सय ९६ मुद्दासमेत अदालतमा दायर गरेको जनाएको छ । यसमध्ये माघमा मात्रै ४९ मुद्दा दायर गरिएको छ ।
एक सय ५९ कामदारको उद्धार
विभागमातहतको उद्धार, राहत तथा समन्वय शाखाले विभिन्न देशमा समस्यामा परेका र स्वदेशमा समेत दु:ख पाएका एक सय ५९ कामदारको उद्धार गरेको जनाएको छ । माघ महिनामा मात्रै १४ कामदारको उद्धार भएको शाखाले जनाएको छ । उक्त शाखामा स्वदेश तथा विदेशमा कठिनाइ भोगेको ६ सय ६७ उजुरी प्राप्त भएको र दुई सय ३७ लाई क्षतिपूर्तिसमेत दिलाएको विभागको तथ्यांक छ । त्यस्तै, तीन सय ७६ उजुरीलाई आपसी सहमतिमा टुंग्याएको विभागले जनाएको छ ।
विभागको चालू खर्च लयमा, पुँजीगत खर्च निराशाजनक
विभागलाई चालू आव ०८२/८३ का लागि १६ करोड ३५ लाख ७४ हजार रुपैयाँ बजेट विनियोजन भएको थियो । त्यसमध्ये चालूतर्फ १० करोड ८४ लाख ७० हजार विनियोजन भएकोमा माघ मसान्तसम्म ५४.७० प्रतिशत खर्च भएको छ । तर, पुँजीगत खर्च चार करोड ५६ लाख ८० हजार विनियोजन भएकोमा माघ मसान्तसम्म ५.९४ प्रतिशत मात्रै खर्च भएको छ । त्यस्तै, रोजगार शीर्षकमा ९४ लाख २४ हजार बजेट विनियोजन भएकोमा १२.३८ प्रतिशत मात्रै खर्च भएको विभागले जनाएको छ ।
सात महिनामा ४६९ जना पुगे इजरायल
सरकारीस्तरमा सम्झौता भई कामदार पठाउने प्रणालीअन्तर्गत इजरायलको रोजगारीमा चालू आवको सात महिनामा चार सय ६९ नेपाली पुगेको विभागले जनाएको छ । विभागमातहतको इजरायल शाखाका अनुसार अधिकांश कामदार केयर गिभरका रूपमा गएका हुन् । शनिबारदेखि जारी मध्यपूर्व तनावले इजरायलको रोजगारीमा जान टिकटसमेत लिएर ठिक्क परेका ५२ जना भने अन्योलमा परेका छन् । उनीहरूको उडानतालिका बिहीबार र शुक्रबारका लागि तय भएको थियो । तर, इजरायल आफैँ युद्धमा रहेकाले अहिले सो क्षेत्रमा नेपाली कामदार पठाउन रोक लगाइएको छ । त्यस्तै, थप १५२ जना इजरायल जान पाउने गरी भिसा प्रमाणीकरण भएरसमेत आएकोमा उनीहरूको प्रक्रियासमेत स्थगत गरिएको छ ।
