नेपाली राष्ट्रिय पुरुष टोलीले चैतमा हङकङविरुद्ध दशरथ रंगशालामा अन्तर्राष्ट्रिय मैत्रीपूर्ण खेल हुने भएको छ । अखिल नेपाल फुटबल संघ (एन्फा)ले बुधबार नेपाल र हङकङबिच १२ चैतमा खेल हुने जानकारी गराएको छ । नेपालले यसै वर्ष दोस्रोपटक हङकङसँग खेल्न लागेको हो । फिफा वरीयतामा हङकङ १५३ र नेपाल १८२ स्थानमा छन् । नेपाल गत २३ जेठमा म्याथ्यु रसको प्रशिक्षणमा नेपालले हङकङसँग उसैको मैदानमा प्रतिस्पर्धा गरेको थियो । नेपालले पहिलोपटक हङकङलाई गोलरहित बराबरीमा रोक्न सफल भएको थियो ।
५ मंसिर ०८० पछि नेपालले एएफसीको आधिकारिक फुटबल प्रतियोगिता रंगशालामा खेलेको छैन । एएफसीले रंगशालाको अवस्था अन्तर्राष्ट्रियस्तरको नभएको जनाउँदै प्रतियोगिता आयोजना गर्न दिएको छैन । यद्यपि, रंगशालामा भने फिफाको आयोजनामा खेल भएको छ । दुई वर्षदेखि रंगशालामा अन्तर्राष्ट्रिय खेल भएको छैन । यसबाहेक मैत्रीपूर्ण खेल भने भएको छ । गत भदौमा बंगलादेशविरुद्ध दशरथ रंगशालामा खेलेको थियो । जुन खेल गोलरहित बराबरीमा सम्पन्न भयो । दोस्रो खेल जेन–जी आन्दोलनका कारण हुन सकेन । नेपालले एएफसी एसियन कपको तेस्रो चरणको छनोटअघि हङकङसँग प्रतिस्पर्धा हुन लागेको हो ।
राष्ट्रिय लिगबाट खेलाडी छनोट
एन्फाले हङकङसँगको प्रतिस्पर्धाका लागि खेलाडी छनोट प्रक्रिया अगाडि बढाएको छ । एन्फाले चालू राष्ट्रिय लिग फुटबल प्रतियोगितामा उत्कृष्ट प्रदर्शन गरेका खेलाडीलाई नै प्रारम्भिक चरणमा राख्नेछ । अस्ट्रेलियन प्रशिक्षक म्याथ्यु रसको राजीनामासँगै नेपाली टोली प्रमुख प्रशिक्षकविहीन छ । एन्फाले तत्कालका लागि अन्तरिम प्रशिक्षकका रूपमा हरि खड्कालाई जिम्मेवारी दिएको छ । गत २७ कात्तिकमा बंगलादेशसँग खेल्दा खड्का नै प्रशिक्षक थिए । तेस्रो चरणको अन्तिम खेलमा नेपालले लाओसको सामना गर्दै छ । यो खेल १७ चैतमा हुनेछ । नेपाल एएफसी एसियन कपमा नेपाल लगातार पाँच खेलमा पराजित भएको छ । लाओससँग प्रतिस्पर्धा गर्नुअघि नै नेपाल मसूह चरणबाट बाहिरिसकेको छ । नेपाल आफ्नो समूहमा अंकविहीन छ । नेपाल इतिहासमै पहिलोपटक लाओससँग दोस्रो खेलमै पराजित भएको थियो ।
नेपालको प्रतिद्वन्द्वी कंगो
नेपाली राष्ट्रिय महिला फुटबल टोली अप्रिलमा फिफाको सिरिजमा सहभागी हुनेछ । फिफाले निकालेको ‘ड्र’अनुसार नेपाली महिला टोलीको पहिलो प्रतिद्वन्द्वी नै कंगो रहेको छ । कंगोविरुद्धको दुई अन्तर्राष्ट्रिय मैत्रीपूर्ण खेल अप्रिलमा हुनेछ । नेपालले १५ अप्रिलमा कंगोसँग खेल्नेछ । सोही दिन घरेलु टोलीले ओसिनिया फुटबल महासंघ (ओएफसी)का १३ राष्ट्रमध्ये एकसँग खेल्नेछ । तीन दिनपछि विजेता टोलीले एक–अर्कासँग खेल्नेछ । सोही दिन हार्ने टोलीबिच पनि प्रतिस्पर्धा हुनेछ ।
गत महिना फिफा सिरिजका आयोजक र समूहको घोषणा भएको थियो । यो पुरुष र महिला राष्ट्रिय टिमका लागि अन्तर्राष्ट्रिय विन्डोमा प्रतिस्पर्धा बढाउनका लागि फिफाको महत्वपूर्ण कदम हो । नोभेम्बर २०२५ मा विस्तारित ढाँचा घोषणा भएसँगै फिफा सिरिज २०२६ मा ४८ राष्ट्रिय टोलीले मार्च र अप्रिलको अन्तर्राष्ट्रिय खेल विन्डोमा १२ समूहका चार टोलीले प्रतिस्पर्धा गर्नेछन् ।
११ संघले सिरिज आयोजना गर्ने
फिफामा २११ सदस्य राष्ट्र छन् । ११ फिफा सदस्य राष्ट्रले सिरिज आयोजना गर्नेछन् । नौ पुरुष समूह र तीन महिला समूह छन् । ६ फिफा कन्फेडरेसन (महादेशीय संघ)बाट टोलीहरू सहभागी छन् । पुरुष समूहका आयोजकमा अस्ट्रेलिया, अजरबैजान, इन्डोनेसिया, काजकिस्तान, न्युजिल्यान्ड, प्युटो रिको, वान्डा र उज्वेकिस्तान हुन् ।
