नेपालको ऊर्जा दक्ष, न्यून–कार्बन तथा जलवायु उपयुक्त भवन निर्माण प्रवद्र्धन गर्ने लक्ष्यसहित सञ्चालन गरिएको चारवर्षे ‘बिल्डिङ इनर्जी इफिसेन्सी इन नेपाल’ (बिन) परियोजनाअन्तर्गत दुई सय ६४ भवन निर्माण गरिएको छ ।
अस्ट्रियाको युनिभर्सिटी अफ इन्सब्रुकको नेतृत्वमा नेपालका मिनर्जी प्रालि, भारतको ग्रिनटेक नलेज सोलुसन्स प्रालि र स्पेनको एसोसियासियोन एस्पान्योला दे नोर्मालिसासियोनको सहकार्यमा सञ्चालन भएको परियोजना बागमती, लुम्बिनी र गण्डकी प्रदेशका ६० स्थानीय तहमा कार्यान्वयन गरिएको थियो । यी भवनहरूमा गरिएको अध्ययनले भित्री तापक्रममा ९ डिग्री सेल्सियससम्मको भिन्नता र ८८ प्रतिशतसम्म ‘डिसकम्फर्ट आवर’ (असहज समय)मा कमी आएको देखाएको परियोजनाले जारी विज्ञप्तिमा जनाएको छ । यस अवधिमा परियोजनाले सूक्ष्म, साना तथा मध्यम उद्यम (एमएसएमइज)लाई तालिम र सशक्तीकरण कार्यक्रम सञ्चालन गरेको छ ।
यसैगरी, निष्क्रिय शीतलीकरण (प्यासिभ कुलिङ) र हलो बिक्रिसजस्ता नवीन प्रविधिको प्रवर्द्धन, नीतिगत संवादमा सहयोग तथा ऊर्जा–दक्ष भवनका बहुआयामिक फाइदाबारे जनचेतना अभिवृद्धि गरेको बताइएको छ । यस अवधिमा ४० स्थानीय तहले ऊर्जा दक्ष भवन निर्माणसम्बन्धी उपनियम वा कार्यविधि स्वीकृत गरेका छन् ।
साथै, राष्ट्रियस्तरका तीनवटा र प्रदेशस्तरको एकवटा नीतिगत दस्ताबेज तयार पारिएको छ । भवन निर्माण क्षेत्रमा आबद्ध नौ सय ६१ साना तथा मझौला उद्यमलाई ऊर्जा दक्ष डिजाइन, सामग्री उत्पादन र प्रविधिसम्बन्धी तालिम प्रदान गरिएको छ ।
