महाशिवरात्रिका अवसरमा पशुपतिनाथ मन्दिर दर्शन गर्न आउने दशनार्थीलाई ‘निर्वाचन प्रहरी’ले पनि सुरक्षा दिँदै छ । चार हजार सुरक्षाकर्मी परिचालन गरिएकामा पाँच सय ‘निर्वाचन प्रहरी’ छन् । आइतबार शिवरात्रिका लागि शनिबारदेखि नै सुरक्षा व्यवस्था गरिएको छ ।
जिल्ला प्रहरी परिसर काठमाडौंका अनुसार परिचालित सुरक्षाकर्मी तीन सिफ्टमा खटिनेछन् । दर्शनार्थीको लाइन व्यवस्थापन गर्नेदेखि आपराधिक गतिविधि नियन्त्रणसम्मका कार्य गर्नेछन् । विशेषगरी यस्ता पर्वमा दर्शनार्थी लुटिने सम्भावना अधिक हुन्छ । लुटपाट नियन्त्रणका लागि ठुलो संख्यामा सादा पोसाकका प्रहरी परिचालन गरिएका छन् । जिल्ला प्रहरी परिसर काठमाडौंका डिएसपी कौशल बुढाथोकीले महाशिवरात्रिमा पशुपतिनाथ मन्दिर दर्शनका लागि आउनेको सुरक्षाका लागि आवश्यक सबै तयारी पूरा भएको र यसका लागि निर्वाचन प्रहरीसहित झन्डै चार हजार सुरक्षाकर्मी परिचालन गरिएको बताए ।
‘महाशिवरात्रिका लागि आवश्यक सुरक्षाका सबै प्रबन्ध पूरा भएका छन् । यस क्रममा काठमाडौं परिसरको तीन हजार दुई सय, निर्वाचन प्रहरी पाँच सय र बाँकी ट्राफिक प्रहरी खटिँदै छन् । कुल चार हजारहाराहारीमा सुरक्षाकर्मी परिचालनमा तीन हजार दुई सय प्रहरी, पाँच सय निर्वाचन प्रहरी र बाँकी ट्राफिक प्रहरी तैनाथ हुँदै छन्,’ उनले भने ।
प्रहरीका अनुसार पर्वभर सिसिक्यामेरा र ड्रोनबाट समेत सुरक्षा निगरानी गरिनेछ । ५० भन्दा धेरै सिसिक्यामेरा र दर्जनभन्दा धरै ड्रोन क्यामेरा सञ्चालनमा ल्याइनेछ । यसका लागि प्राविधिक व्यवस्थापन भइसकेको डिएसपी बुढाथोकीले बताए । उनले भने, ‘शिवरात्रि पर्व अवधिभर ड्रोनबाट पनि गस्ती गरिनेछ । सिसिक्यामेराबाट पनि भिडको निगरानी गरिनेछ । शंकास्पद गतिविधिमाथि प्रहरी सक्रिय हुनेछ । शंकास्पद व्यक्तिलाई पक्राउ गरिनेछ । यसका लागि आवश्यक सबै तयारी पूरा भएका छन् ।’
प्रहरीले पर्वभर गाँजा र भाङजस्ता लागुपदार्थ बिक्री–वितरण र सेवनलाई पनि निगरानी गर्नेछ । धार्मिक उद्देश्यबाहेक अन्य तवरले प्रयोग गरिएका गाँजा र भाङ नियन्त्रण गरिने प्रहरीले जनाएको छ ।
