गैरआवासीय नेपाली संघ, राष्ट्रिय समन्वय परिषद् कतारले खाडी मुलुकमा कार्यरत नेपाली श्रमिकहरुको आर्थिक, पारिवारिक तथा सामाजिक अवस्थालाई मध्यनजर गर्दै आफ्नो वर्तमान जीवनशैली र आर्थिक व्यवहारप्रति गम्भीर रुपले सोच्न अपिल गरेको छ। परिषद्का अध्यक्ष कृष्ण पन्थी र महासचिव विवेक पुलामी मगरले बिहीबार प्रेस विज्ञप्तिमार्फत खाडीमा कार्यरत नेपाली श्रमिकहरुको आर्थिक, पारिवारिक तथा सामाजिक अवस्थालाई नजिकबाट हेर्दा दीर्घकालीन बचतको अभाव, बढ्दो देखावटी खर्च र भविष्यको स्पष्ट योजना नहुँदा विभिन्न चुनौती तथा समस्याहरु देखिएकाले गम्भीर रुपले सोच्न अपिल गरेका हुन् ।
विज्ञप्तिमा नियमित आम्दानी हुँदाहुँदै पनि आर्थिक असुरक्षा, पारिवारिक तनाव र बुढेसकालको अनिश्चितता बढ्दै जानु प्रवासी नेपाली श्रमिकको चिन्ताको विषय भएको औँल्याइएको छ । ‘वैदेशिक जीवनको प्रारम्भिक चरणमा ऋण तिर्ने, त्यसपछि क्रमशः ऋण थपिंदै जाने, देखावटी खर्चमा फस्ने र बुढेसकालको सुनिश्चितता बिना जीवन बिताउने प्रवृत्तिले पारिवारिक सम्बन्ध, मानसिक स्वास्थ्य तथा सामाजिक स्वास्थ्यमा गम्भीर असर पुर्याएको देखिन्छ’ विज्ञप्तिमा भनिएको छ ‘फलस्वरुप पछिल्ला वर्षहरुमा पारिवारिक विछोड, सम्बन्ध बिच्छेद तथा एक्लोपनका घटनाहरु वृद्धि हुनु हामी सबैका लागि गम्भीर चेतावनी हो ।’
केवल आजको खर्च आवश्यकता पूरा गर्न मात्र होइन, मूलतः परिवारको सुरक्षित र सम्मानित भविष्य निर्माण गर्न विदेश आएका हौं भन्ने गम्भीर विषयलाई मनन गर्न आग्रह गर्दै विज्ञप्तिमा आम्दानीको निश्चित अंशको नियमित बचत, देखावटी खर्चभन्दा दीर्घकालीन आर्थिक योजनालाई प्राथमिकता दिन सुझाइएको छ ।
त्यस्तै, परिवारसँग निरन्तर संवाद, विश्वास र भावनात्मक सम्बन्ध कायम राख्ने, बालबालिकाको शिक्षा सम्बन्धी निर्णय क्षमता र योजना अनुसार गर्ने, विदेश जीवनसँगै बुढेसकालको आर्थिक तथा स्वास्थ्य सुरक्षाको व्यवस्था गर्न विज्ञप्तिमार्फत आग्रह गरिएको छ । विज्ञप्तिमा विदेशको जीवन सीमित अवधिका लागि भएपनि परिवार, स्वास्थ्य र बुढेसकालका लागि आज गरिने सानो सचेत निर्णयले ठूलो संकटबाट जोगाउन सकिने भएकाले सचेत, सुरक्षित र सम्मानित नेपाली समुदाय निर्माणका लागि परिषद् प्रतिबद्ध रहेको जनाइएको छ ।
