सरकारले नेपाल प्रहरीको रासन बढाउने निर्णय गरेको छ। बिहीबार बसेको मन्त्रिपरिषद्को बैठकले यससम्बन्धि निर्णय गरेको हो।
गृहमन्त्री ओमप्रकाश अर्यालका अनुसार १ फागुनदेखि लागु हुने गरी प्रहरीको रासन स्केल र दैनिक रकम बढाउने निर्णय भएको हो। अन्य सुरक्षा निकायको तुलनामा प्रहरीको रासनस्केल कम भएपछि बढाउने निर्णय भएको हो।
प्रहरी प्रवक्ता अबिनारायण काफ्लेका अनुसार प्रहरीले रासनमा पाउने चामलको मात्रा बढेको छ । हाल दैनिक प्रहरीले ६ सय ९० ग्राम चामल पाउँदै आएकोमा अब सात सय २० ग्राम पाउने छन् । त्यस्तै, दैनिक एउटा अन्डा, २५ ग्राम कुखुराको मासु र २५ ग्राम बिस्कुट पनि थप भएको छ । त्यस्तै, सुख्खा तरकारी(गेडागुडी) दैनिक ५० ग्रामबाट ५५ ग्राम पुगेको छ । यी खाद्यसामाग्री थप हुँदा रासनभत्ता करिब १० प्रतिशतले बढ्ने प्रहरी प्रवक्ता काफ्ले बताए । हाल प्रहरीले नगदमै रासन लिदै आएका छन् ।
हरेक जिल्लामा रासनको दररेट फरक छन् । काठमाडौं उपत्यकामा हाल दैनिक दुई सय १ रुपैयाँ २५ पैसा पाउँदै आएकोमा अब दुई सय २१ रुपैयाँ ९१ पैसा पाउनेछन् ।
सबैभन्दा कम रासनभत्ता झापा जिल्लामा छ । जहाँ दैनिक एक सय ८० रुपैयाँ ५५ पैसा पाउँदै आएकोमा अब एक सय ९९ रुपैयाँ ५५ पैसा पाउने छन् । सबैभन्दा धेरै रासनभत्ता हुम्लाको उत्तरी भेगमा कार्यरत प्रहरीले पाउँछन् । त्यहाँका प्रहरीले दैनिक आठ सय ६३ रुपैयाँ ६५ पैसा पाउँदै आएकोमा अब नौ सय ५२ रुपैयाँ ३६ पैसा पाउने भएका छन् । नयाँ रासनदर १ फागुनदेखि कार्यान्वायनमा आउने गृहमन्त्री ओमप्रकाश अर्यालले बताए ।
