फागुन २१ मा हुने प्रतिनिधिसभा निर्वाचनका लागि दुईवटा निर्वाचन क्षेत्र रहेको नवलपुरमा अधिकांश उम्मेदवार नयाँ अनुहारका रहेका छन् । सधैँ पुरानो अनुहारले मौका पाउने नेपाली कांग्रेस र नेपाली कम्युनिस्ट पार्टी (नेकपा)ले समेत यसपालि नवलपुरमा दुवै क्षेत्रमा नयाँ उम्मेदवारलाई अगाडि सारेका छन् । ०७९ को प्रतिनिधिसभाको निर्वाचनमा दुवै क्षेत्र नेपाली कांग्रेसले जित हात पारेको नवलपुरमा प्रतिनिधिसभाको संसद् भवनमा छिर्नका लागि २६ वर्षका जेन–जीदेखि ७० कटेकासम्म चुनावी मैदानमा छन् ।
नवलपुरमा कुनै पनि उम्मेदवारविरुद्ध उजुरी नपरे पनि कांग्रेसबाट दुईजनाको उम्मेदवारी परेको नवलपुर निर्वाचन क्षेत्र नं. १ मा एकजनाको उम्मेदवारी रद्ददेखि दुईजनाले उम्मेदवारी फिर्ता लिनेसम्मको काम भएको छ । त्यसैगरी शुक्रबार साँझ उम्मेदवारहरूको अन्तिम नामावली प्रकाशन गरी उनीहरूलाई चुनाव चिह्नसमेत प्रदान गरिसकेको छ ।
नवलपुर क्षेत्र नं. १ मा तीनजना स्वतन्त्रसहित १६ जनाको उम्मेदवारी कायम भएको छ भने नवलपुर क्षेत्र नं. २ मा पाँचजना स्वतन्त्रसहित १८ जना उम्मेदवारहरू चुनावी मैदानमा होमिएका छन् । तीमध्ये यसअघि प्रतिनिधिसभा निर्वाचनमा प्रतिनिधित्व गरिसकेको नेकपा एमालेका तिलबहादुर महत क्षेत्री (तिलक) पुराना अनुहार हुन् भने राष्ट्रिय स्वतन्त्र पार्टीका राजन गौतम पुराना अनुहार हुन् । तर, गौतमले संसदमा प्रतिनिधित्व गर्ने मौका भने पाएका छैनन् । यी दुईजनाबाहेक चुनावी मैदानमा होमिएका बाँकी उम्मेदवार नयाँ अनुहार हुन् ।
एमालेका महत नवलपुर क्षेत्र नम्बर २ बाट उम्मेदवार बनेका छन् । उनी ०७४ को निर्वाचनमा विजयी भए पनि ०७९ को निर्वाचनमा नेपाली कांग्रेसका विष्णु कार्कीसँग पराजित भएका थिए । त्यसैगरी, रास्वपा नवलपुर १ बाट उम्मेदवार बनेका राजन गौतम यसअघि नवलपुर १ मै कांग्रेसका नेता डा. शशांक कोइरालासँग झिनो मतान्तरले पराजित भएका थिए ।
यसअघि दुईवटै निर्वाचन क्षेत्रमा जित हात पारेको नेपाली कांग्रेसले दुवैजना उम्मेदवारलाई टिकट नदिएर नयाँ अनुहारलाई अगाडि सारेको छ। जसअन्तर्गत नवलपुर निर्वाचन क्षेत्र नं. १ बाट बालकृष्ण घिमिरे र नवलपुर निर्वाचन क्षेत्र नं. २ बाट ओमबहादुर घर्तीलाई अगाडि सारेको छ । घिमिरे नेपाली कांग्रेस नवलपुरका उपाध्यक्ष हुन् । उनी लुम्बिनी आदर्श डिग्री कलेजमा शिक्षण पेसामा आबद्ध छन् भने उनी कानुन व्यवसायी पनि हुन् ।
नवलपुर २ बाट कांग्रेस अगाडि सारेको उम्मेदवार ओमबहादुर घर्ती कांग्रेसनिकट नेपाल लोकतान्त्रिक आदिवासी जनजाति महासंघका केन्द्रीय अध्यक्ष हुन् । मगर समुदायको ठुला जनसंख्या रहेको नवलपुरमा कांग्रेसले यसपटक मगरलाई समेत उम्मेदवार बनाएर मगर समुदायको मन जित्ने प्रयास गरेको छ । कहिले जित त कहिले हार व्यहोर्दै आएको नेकपा एमालेले नवलपुरमा एकजना नयाँ अनुहारलाई अगाडि सारेको छ भने एकजना पुराना अनुहारलाई अगाडि सारेको छ । एमालेले नवलपुर क्षेत्र नम्बर १ बाट अगाडि सारेका उम्मेदवार भागीरथ सापकोटा एमालेनिकट उद्योग वाणिज्य महासंघका केन्द्रीय अध्यक्ष हुन् । उनी पहिलोपटक प्रतिनिधिसभा निर्वाचनका उम्मेदवार बनेका हुन् ।
लोकप्रसाद भुर्तेल नेकपाबाट नवलपुर क्षेत्र नम्बर १ बाट र गणेशमान महतो नेकपा नवलपुर क्षेत्र नम्बर २ बाट उम्मेदवार बनेका छन् । यी दुवैजना उम्मेदवार प्रतिनिधिसभा सदस्यको निर्वाचनका लागि नयाँ अनुहार हुन् । गणेशमान महतो यस क्षेत्रका थारू आन्दोलन तथा जनजाति आन्दोलनका अगुवा मानिन्छन् । यता राष्ट्रिय स्वतन्त्र पार्टीले नवलपुर २ बाट जेन–जी युवा २६ वर्षीय मनीष खनाललाई अगाडि सारेको छ । उनले बालेननिकट रहेकै कारण टिकट पाएका हुन् । उनी विद्यालयमा शिक्षण पेसामा संलग्न थिए भने कानुन व्यवसायी पनि हुन् ।
राप्रपा नवलपुरले पनि यसपटक दुवै निर्वाचन क्षेत्रबाट नयाँ उम्मेदवारलाई अगाडि सारेको छ । अघिल्लोपटक निर्वाचनमा प्रत्यक्षतर्फ जित हात नपारे पनि समानुपातिकतर्फ राम्रो मत प्राप्त गरेको राप्रपाले नवलपुर १ बाट दीपकचन्द्र बस्ताकोटी र नवलपुर २ बाट रुनकुमारी महतोलाई अगाडि सारेको छ । यी दुवै नयाँ उम्मेदवार हुन् ।
ती बाहेक नवलपुरमा श्रम संस्कृति पार्टीले नवलपुर १ बाट भीमचन्द्र गुरुङ, नवलपुर २ बाट कमल चापागाईं, विप्लव नेतृत्वका नेकपा (माओवादी)ले नवलपुर १ बाट बेलबहादुर सारु, नवलपुर २ बाट गंगाप्रसाद ज्ञवाली (सुमन) लाई उम्मेदवार बनाएको छ । नेकपा (माओवादी) ले पहिलोपटक निर्वाचनमा भाग लिँदै छ । त्यसैगरी यहाँ राष्ट्रिय जनमोर्चाबाट नवलपुर १ मा चन्द्रदत्त सापकोटा, नवलपुर २ मा विष्णु गिरी, राष्ट्रिय जनमुक्ति पार्टीबाट नवलपुर १ मा शत्रुघन थापा, नवलपुर २ मा खेमबहादुर राना, मंगोल नेसनल अर्गनाइजेसन पार्टीबाट नवलपुर १ मा मंगोल नेसनल अर्गनाइजेसनबाट राजु गुरुङ र नवलपुर २ मा निबबहादुर आलेलाई उम्मेदवार बनाएको छ ।
नवलपुर १ मा जनता समाजवादी पार्टीबाट छविलाल राना मगर, उज्यालो नेपाल पार्टीबाट पार्वती गुरुङ, नेसनल रिपब्लिक नेपाल नवलपुर १ मा विष्णुमाया विक र स्वतन्त्र उम्मेदवारको रूपमा अविनाश सुनार, गोकुल शर्मा र विन्दु केसी पनि चुनावी मैदानमा होमिएका छन् । त्यसैगरी नवलपुर २ मा प्रगतिशील लोकतान्त्रिक पार्टीबाट मानसिंह महतो, आम जनता पार्टीबाट लक्ष्मी सोमै मगर, स्वतन्त्र उम्मेदवारको रूपमा गीताकुमारी लामिछाने, टोलबहादुर लुंगेली मगर, पेमबहादुर सिँजाली, भरतप्रसाद वस्ती, भीमाकुमारी भुसाल र सुशीला देवकाेटा पनि चुनावी मैदानमा होमिएका छन् ।
नवलपुरमा नेपाली कांग्रेस, नेकपा एमाले, नेपाली कम्युनिस्ट पार्टी र राष्ट्रिय स्वतन्त्र पार्टीबिच कडा टक्कर हुने आकलन गरिएको छ भने राप्रपा, श्रम संस्कृति पार्टी, उज्यालो नेपाल पार्टी पनि ठुला दलहरूको जितका लागि बाधक बन्ने देखिन सक्ने आकलन गरिएको छ ।
