ल्यान्डफिल साइटको विषयलाई लिएर भएको विवादका कारण पोखरामा १४ दिनदेखि फोहोर उठ्न सकेको छैन । यसअघि पोखराको फोहोरमैला व्यवस्थापनका लागि एसियाली विकास बैकको ऋण सहयोगमा ०६१ मा पोखरा महानगरपालिका– १८ बाच्छेबुडुवामा ल्यान्डफिल्ड साइट निर्माण गरी फोहोर व्यवस्थापन हुँदै आएका थियो ।
२५ वर्षका लागि पोखराको फोहोर फ्याँक्न सकिने गरी निर्माण गरिएको बाच्छेबुडुवास्थित ल्यान्डफिल साइट १७ पुस ०७९ मा पोखरा अन्तर्राष्ट्रिय विमानस्थल सञ्चालनमा आएपछि बन्द भएको थियो । विमानस्थलका कारण सञ्चालनमा रहेको ल्यान्डफिल साइट बन्द भएपछि पोखराको फोहोर अस्थायी रूपमा ६ महिनाको समय तोकेर पोखरा–३२ स्थित लामेआहालमा व्यवस्थापन गरिएको थियो । ६ महिनाका लागि भनिएकोमा करिब साढे तीन वर्ष हुन लाग्दासमेत स्थायी साइट तयार हुन नसक्दा फोहोर विसर्जनलाई लिएर विवाद बढ्दै गएको हो । ६ महिनाका लागि भनिएको लामेआहालस्थित अस्थायी ल्यान्डफिल साइटसमेत भरिएको र त्यसको वैकल्पिक व्यवस्था हुन नसक्दा १४ दिनदेखि पोखराको फोहोर सडक र घरमै थुप्रिएको छ ।
पोखरामा हाल दैनिक एक सय ८० देखि दुई सय टन फोहोरमैला संकलन हुने गरेको महानगर ल्यान्डफिल साइट इन्चार्ज हर्क गायकले जानकारी दिए । उनका अनुसार फोहोर फाल्दै आएको लामेआहालस्थित अस्थायी साइट भरिएकाले फोहोर व्यवस्थापनमा समस्या भएको छ । लामेआहालस्थित खोलाले कटान गरेको खाल्डोमा लगी अस्थायी रूपमा फोहोर फाल्दै आइएकोमा त्यो भरिएको र अर्को स्थानको टुंगो नलाग्दा समस्या भएको उनको भनाइ छ ।
लामेआहालमा समेत गरेको सम्झौताअनुसार महानगरले काम नगरेको भन्दै स्थानीयले पटक–पटक फोहोर लैजान अवरोध गर्दै आएका थिए । दुई सातादेखि फोहोर नउठदा पोखराका मुख्य र भित्री सडकको चोक, सडकछेउमा फोहोरको थुप्रो देखिन थालेका छन् । लामेआहालमा अस्थायी रूपमा फोहोर फ्याँक्दै आएको महानगरले पोखरा–३३ स्थित झाँक्रीखोलामा ल्यान्डफिलसहितको आधुनिक फोहोर प्रशोधन केन्द्र निर्माणको योजना अघि सारे पनि स्थानीयको विरोधपछि अघि बढ्नसकेको छैन । झाँक्रीखोलाको योजना दुई वर्षअघि सुरु गरिएको थियो ।
दुई सातादेखि फोहोर उठ्न नसकेपछि नगरप्रमुख धनराज आचार्यको आह्वानमा शनिबार सर्वपक्षीय बैठक बस्यो । बैठकमा दलका जिल्ला र नगरस्तरीय समितिका प्रमुख तथा प्रतिनिधिहरू, प्रमुख जिल्ला अधिकारी, जिल्लास्थित चारवटै सुरक्षा निकायका प्रमुख तथा प्रतिनिधिहरूको सहभागिता थियो । लामो समयदेखि फोहोर नउठ्दा नगरवासीको जनस्वास्थ्यमा समेत गम्भीर असर पर्न सक्ने भएपछि समाधानका लागि आचार्यले बैठक बोलाएका हुन् ।
