सरकारले जेन–जी परिषद् गठनका लागि सुझाव माग गरेको छ। शुक्रबार प्रधानमन्त्री तथा मन्त्रिपरिषद् कार्यालयले सूचना जारी गर्दै परिषद् गठनबारे लिखित सुझाव आह्वान गरेको हो।
नेपाल सरकार र जेन–जी प्रतिनिधिबिच भएको सम्झौता कार्यान्वयनका लागि परिषद् गठन गर्न लागेकाले त्यसका लागि सुझाव मागेको सूचनामा उल्लेख छ। यसका लागि इमेल ठेगाना ([email protected]) समेत दिइएको छ। यही २९ पुससम्ममा लिखित सुभाव पठाउन सूचनामा भनिएको छ।
‘मिति २०८२/०८/२५ गते नेपाल राजपत्रमा प्रकाशित जेन–जी जनआन्दोलनका प्रतिनिधि र नेपाल सरकारबिच भएको सम्झौताको बुँदा नम्बर ९ बमोजिम गठन हुने जेन–जी परिषद्को संरचना, जिम्मेवारीलगायतका विषयमा निम्न इमेल ठेगानामा लिखित सुझाव पठाउनुहुन अनुरोध छ,’ प्रधानमन्त्री तथा मन्त्रिपरिषद् कार्यालयद्वारा जारी सूचनामा भनिएको छ।
सरकार र जेन–जी प्रतिनिधिबिच भएको सम्झौताको बुँदा नम्बर ९ मा ‘जेन–जी आन्दोलनको मर्म र भावनाअनुसार शासन व्यवस्था सञ्चालनमा सरकारलाई योगदान गर्न, खबरदारी गर्न, सुशासन, दिगो विकास तथा समृद्धिका लागि नेपाल सरकारलाई सल्लाह, सुझाव र सहयोग प्रदान गर्नका लागि जेन–जी परिषद् गठन गरिनेछ,’ भनिएको छ।
त्यसैबमोजिम परिषद् गठनको सुझावका लागि सरकारले सूचना निकालेको हो।
