कपिलवस्तुस्थित सशस्त्र प्रहरी बल नेपाल २८ नम्बर गणले १९औँ स्थापना दिवस मनाएको छ। कपिलवस्तु नगरपालिका– ६, बर्मेलीस्थित गणपरिसरमा विभिन्न कार्यक्रम गर्दै स्थापना दिवस मनाएको हो ।
कार्यक्रममा सशस्त्र प्रहरी बल नेपाल नम्बर ५ बिन्ध्यावासिनी बाहिनीपति सशस्त्र प्रहरी नायब महानिरीक्षक डिआइजी दीपेन्द्र कुँवरले कठिन परिस्थितिमा पनि सशस्त्र प्रहरी बलले राष्ट्र र नागरिकप्रति आफ्नो जिम्मेवारी इमानदारीपूर्वक निर्वाह गर्दै आएको उल्लेख गरेको छन् । स्थापना दिवसले संगठनलाई थप जिम्मेवार र कर्तव्यनिष्ठ बनाएको र संगठनको यात्रामा भएका त्याग, समर्पण र बलिदानको स्मरण गर्नुपर्ने बताए ।
डिआइजी कुँवरले विपत् व्यवस्थापन, सीमा सुरक्षा तथा शान्ति सुरक्षामा सशस्त्र प्रहरी बलको आवश्यकता बढ्दै गएको बताए । सशस्त्र प्रहरीको सक्रिय भूमिकाले राजस्व संकलनमा समेत सकारात्मक योगदान पुगेको उनले उल्लेख गरे ।
कार्यक्रममा जिल्ला समन्वय समिति प्रमुख बाबुराम आचार्यले विपत् व्यवस्थापन र सीमा सुरक्षामा सशस्त्र प्रहरी बलको भूमिका अत्यन्तै महत्त्वपूर्ण र प्रशंसनीय रहेको बताएका छन् । प्रमुख जिल्ला अधिकारी जनार्दन गौतमले कठिन परिस्थितिमा स्थापना भएको सशस्त्र प्रहरी बलले चुनौतीलाई अवसरमा बदल्दै अगाडि बढेको उल्लेख गरे ।
कपिलवस्तु नगरपालिका प्रमुख सुदीप पौडेलले सशस्त्र प्रहरी बललाई आगामी दिनमा अझ कर्मशील, अनुशासित र इमानदार भएर राष्ट्रसेवामा समर्पित रहन सुझाव दिए ।
सशस्त्र प्रहरी बल सीमा सुरक्षा कार्यालय कपिलवस्तुको स्थापना १५ पुस ०६४ मा कपिलवस्तु नगरपालिका– ३, तौलिहवास्थित नेपाल कृषि सामग्री संस्थानको पुरानो गोदामबाट भएको थियो । हाल गण हेडर्क्वाटर सदरमुकाम तौलिहवाबाट करिब सात किलोमिटर उत्तर–पश्चिममा अवस्थित रहेको छ।
स्थापना दिवसको अवसरमा भलिबल, ब्याडमिन्टन, ३०० मिटर दौड प्रतियोगिता, मठ–मन्दिर सरसफाइ तथा रक्तदान कार्यक्रमसमेत सञ्चालन गरिएकाे थियाे ।
