आगामी २१ फागुनमा हुन लागेको प्रतिनिधिसभा निर्वाचनका लागि नेपाली कम्युनिष्ट पार्टी (नेकपा) कञ्चनपुरले उम्मेदवार छनौट प्रक्रिया सुरु गरेको छ ।
नेकपा कञ्चनपुरका नेता खेम पाण्डेयले क्षेत्रबाट जिल्ला बैठकमा आएका नामावलीमाथि बैठकमा छलफल भइरहेको बताएका छन् । ‘हामीले बिहीबार क्षेत्रबाट आएका आकांक्षी उम्मेदवारबारे छलफल गरेका छौैँ,’ उनले भने, ‘पार्टीले सीमा तोकेभन्दा बढी आकांक्षी देखिएका छन् ।’ जिल्लाका तीनवटै निर्वाचन क्षेत्रबाट ५ देखि १४ सम्म नाम आएकाले एक दुई दिनभित्रै थप छलफल गरेर सम्बन्धित आकांक्षी उम्मेदवार पार्टीसँग छलफल गरेर माथिल्लो पाटी कमिटिमा सिफारिस गर्ने बताए ।
नेकपाबाट कञ्चनपुरमा कोही पनि नेता सर्वसम्मत सिफारिस भएका छैनन । ‘हाम्रो जिल्लाबाट समानुपातिकतर्फ आठ उम्मेदवारको नाम सिफारिस गर्ने सीमा रहेको छ,’ उनले भने, ‘प्रत्यक्ष र समानुपातिक एकैसाथ टुङगो लगाउँछौँ ।’
