न्युजिल्यान्डका विश्वचर्चित ब्याट्सम्यान मार्टिन गुप्तिलले दोस्रो संस्करणको नेपाल प्रिमियर लिग क्रिकेटमा विराटनगर किङ्सबाट खेल्ने भएका छन् । विराटनगरले दोस्रो सिजनका लागि गुप्तिललाई निरन्तरता दिएको जनाएको छ । विराटनगरका लागि उनी चौथो विदेशी खेलाडीका रूपमा भित्रिएका हुन् । विराटनगरले गत शुक्रबार दक्षिण अफ्रिकाका आक्रामक ब्याट्सम्यान फाफ डु प्लेसिसलाई अनुबन्ध गरेको थियो । विराटनगरले यसपटक एनपिएलमा दमदार उपस्थिति जनाउन विश्वस्तरीय खेलाडी भित्र्याउने क्रमलाई निरन्तरता दिएको छ ।
उनले समग्रमा ३५१ टी–२० खेल खेलेका छन् । उनले न्युजिल्यान्डको राष्ट्रिय टोलीबाट १२२ टी–२० आईमा तीन हजार ५३१ रन जोडेका छन् । उनीसँग अन्तर्राष्ट्रिय र फ्रेन्चाइज क्रिकेटको धेरै अनुभव छ । विराटनगरले स्कटल्यान्डका अनुभवी जर्ज मन्से र अस्ट्रेलियाका साम हिजलेटलाई अनुबन्ध गरेको छ ।
गुप्तिलले इन्डियन प्रिमियर लिगमा मुम्बई इन्डियन्स, सनराइजर्स हैदराबाद र पन्जाब किंग्सबाट खेलिसकेका छन् । यसैगरी उनीसँग बिग बास लिग, क्यारेबियन प्रिमियर लिग, पाकिस्तानी सुपर लिगलगायत फ्रेन्चाइज लिगको अनुभव छ । विराटनगरले दोस्रो सिजनका लागि मार्की सन्दीप लामिछानेसहित लोकेश बम, प्रतिश जिसी, बसिर अहमद, नरेन भट्ट र सुवास भण्डारीलाई रिटेन गरेको छ ।
गुप्तिलले पहिलो संस्करणको उद्घाटन खेलमा जनकपुर बोल्टविरुद्ध अर्धशतकीय इनिङ्स खेलेका थिए । उनले पहिलो खेलमै ४३ बलमा ५५ रनको योगदान दिएका थिए । एनपिएलको पहिलो संस्करणमा पहिलो अर्धशतकीय इनिङ्स खेल्ने रेकर्ड उनको नाममा छ ।
विश्वकपका दोहोरो शतकधारी
एकदिवसीय विश्वकप इतिहासमा दुईपटक मात्र दोहोरो शतक बनेको छ । सन् २०१५ को विश्वकपमै यो रेकर्ड बनेको थियो । २४ फेबु्रअरी २०१५ मा वेस्ट इन्डिजका क्रिस गेलले जिम्बावेविरुद्ध २१५ रनको दोहोरो शतक लगाएका थिए । सोही विश्वकपमा न्युजिल्यान्डका बायाँहाते ब्याट्सम्यान गुप्तिलले गेलको रेकर्ड बराबरी गरे ।
उनले घरेलु मैदान वेलिंटनमा वेस्ट इन्डिजविरुद्धको खेलमा २३७ रनको दोहोरो शतकीय योगदान दिएका थिए । वेस्ट इन्डिजविरुद्धको सेमिफाइनल खेलमा उनले १६३ बलमा ११ छक्का र २४ चौका प्रहार गरेका थिए । विश्वकपमा सर्वाधिक २३७ रन बनाउने गुप्तिलको कीर्तिमान तोडिएको छैन । उनले वेस्ट इन्डिजविरुद्धको खेलमा अन्तिम ५२ बलमा १३७ रन बटुलेका थिए । एकदिवसीय इतिहासमा उनको यो शतकीय इनिङ्स दोस्रो बृहत् हो । सन् २०१४ मा भारतका रोहित शर्माले श्रीलंकाविरुद्ध २६४ रनको सर्वाधिक व्यक्तिगत बनाएका थिए ।
१५ वर्ष न्युजिल्यान्डको टोलीमा
गुप्तिलले सन् २००९ मा भारतविरुद्ध टेस्ट खेलबाट अन्तर्राष्ट्रिय डेब्यु गरेका थिए । सन् २०२२ मा उनले अन्तिमपटक टोलीबाट टी–२० आई फम्र्याटमा बंगलादेशसँग प्रतिस्पर्धा गरे । लगभग १५ वर्ष न्युजिल्यान्डको टोलीबाट अन्तर्राष्ट्रिय खेल खेलेका उनले टेस्टमा तीन, एकदिवसीयमा १५ तथा टी–२० आईमा दुई शतक लगाएका छन् । यसैगरी टेस्टमा १७, एकदिवसीयमा ३९ र टी–२० आईमा न्युजिल्यान्डका लागि २२ अर्धशतकीय इनिङ्स खेलेका छन् ।
समग्रमा उनले २३ अन्तर्राष्ट्रिय शतक तथा ७६ अर्धशतकीय इनिङ्स खेले । गुप्तिलले एकदिवसीयमा सात हजार ३४६ रन, टेस्टमा दुई हजार ५८६ रन तथा टी–२० आईमा तीन हजार ५३१ रन बटुलेका छन् । उनले न्युजिल्यान्डका लागि पहिलो श्रेणीमा ३१ शतक तथा ५१ अर्धशतकको सहयोगमा १० हजार ४४४ रन जोडेका छन् ।
अमेरिकाका हर्मित सुदूरपश्चिममा
सुदूरपश्चिम रोयल्सले अमेरिकाका बलिङ अलराउन्डर हर्मित सिंहलाई तेस्रो विदेशी खेलाडीका रूपमा अनुबन्ध गरेको छ । यससँगै हर्मितले लगातार दोस्रो सिजन पनि सुदूरपश्चिमबाट खेल्ने भएका छन् । पहिलो सिजनमा उनले पाँच खेलमा आठ विकेट लिएका थिए ।
उनी पहिलो सिजनको एनपिएलमा सबैभन्दा इकोनोमीमा बलिङ गर्ने बलर बनेका थिए । ‘म नेपाल प्रिमियर लिगमा फेरि एकपटक फर्किंदै छु । गत सिजनको अधुरो कामलाई यसपटक पूरा गर्नु छ,’ हर्मितले भनेका छन् । सुदूरपश्चिमका प्रमुख कार्यकारी अधिकृत प्रकाश खड्काले हर्मितको आगमनले टोली थप बलियो बन्ने बताए । ३२ वर्षीय हर्मित बाँयाहाते बलर र बाँयाहाते ब्याट्सम्यान हुन् । उनले २५ टी–२० आईमा २४ विकेट र २३५ रन बनाएका छन् ।
अमेरिकाका लागि उनले २१ एकदिवसीय खेलमा ३१ विकेट र ३२५ रन बनाएका छन् । सन् २०१२ को यू–१९ विश्वकप विजेता भारतीय टोलीका उनी सदस्य थिए । उनले इन्डियन प्रिमियर लिग (आइपिएल)मा राजस्थान रोयल्सका लागि समेत खेलेका छन् ।
