अखिल नेपाल फुटबल संघ (एन्फा)ले पूर्वकप्तान तथा टेक्निकल डिरेक्टर हरि खड्कालाई नेपाली पुरुष राष्ट्रिय फुटबल टोलीको मुख्य प्रशिक्षकमा नियुक्त गरेको छ । अस्ट्रेलियन नागरिक म्याट रोसले बुधबार प्रशिक्षकबाट राजीनामा दिएपछि एन्फाले खड्कालाई राष्ट्रिय टोलीको प्रशिक्षणको जिम्मेवारी दिएको हो । बंगलादेशविरुद्धको मैत्रीपूर्ण तथा एसियन कप छनोटमा मलेसियाविरुद्ध खेल्न खड्काले प्रशिक्षण दिनेछन् । यसअघि उनले महिला राष्ट्रिय फुटबल टोलीको मुख्य प्रशिक्षकको जिम्मेवारी सम्हालेका थिए । महिला टोलीको प्रशिक्षक हुँदा नक्कली प्रमाणपत्रमा दोषी ठहरिएपछि उनले पदबाट राजीनामा दिएका थिए ।
यसअघि खड्का नेपाल पुलिसका पूर्वसहायक निरीक्षक थिए । उनले पुलिसबाट लामो समय कप्तानी गर्दै सहिद स्माकर ‘ए’ डिभिजन लिगसमेत जितेका थिए । राष्ट्रिय फुटबल टोलीका पूर्वकप्तानसमेत रहेका खड्कालाई ०७८ सालको फागुन ५ गते विशेष अदालतले नक्कली शैक्षिक प्रमाणपत्र मुद्दामा दोषी ठहर गरेको थियो । खड्काविरुद्ध अख्तियार दुरुपयोग अनुसन्धान आयोगले ०७८ सालको माघ १२ गते विशेष अदालतमा मुद्दा दायर गरेको थियो । उनले प्रहरी सहायक निरीक्षकमा नियुक्त पाउन नक्कली प्रमाणपत्र पेस गरेको अख्तियारको अनुसन्धानबाट खुलेको थियो । अदालतबाट दोषी ठहर भएपछि उनले पुलिसको जागिर छाडेका थिए ।
एएफसी र फिफाले कुनै पनि राष्ट्रको मुख्य प्रशिक्षक बन्न प्रो लाइसेन्स हुनुपर्ने जनाएको छ । नेपालमा प्रो लाइसेन्सप्राप्त कोही पनि प्रशिक्षक छैनन् । यसअघि एन्फाले पुरुष तथा महिला टोलीका मुख्य प्रशिक्षकमा प्रो लाइसेन्स भएका विदेशी प्रशिक्षक नियुक्त गरेको थियो । महिलातर्फका भिक्टरले एन्फाको कमजोर व्यवस्थापन खुलासा गर्दै राजीनामा दिएका थिए । रोसले भने नेपाली पुरुष टोलीलाई राम्रो नतिजा दिलाउन नसक्दा नैतिकताका आधारमा राजीनामा दिएको एन्फाको भनाइ छ ।
मैत्रीपूर्ण तथा एसियन कप छनोट
आगामी १३ नोभेम्बरमा नेपालले बंगलादेशसँग एउटा अन्तर्राष्ट्रिय मैत्रीपूर्ण खेल खेल्दै छ । यो खेल फिफा विन्डोमा पर्छ । खेलको नतिजाले फिफा वरीयतामा फरक पर्नेछ । त्यसपछि नेपाली राष्ट्रिय पुरुष टोलीले १८ नोभेम्बरमा एएफसी एसियन कपअन्तर्गत छनोट चरणमा मलेसियाविरुद्ध प्रतिस्पर्धा गर्नेछ । यो खेल नेपालमै हुनुपर्ने थियो । तर, एएफसीले दशरथ रंगशालामा अन्तर्राष्ट्रिय खेल खेलाउन अयोग्य भनेपछि नेपालले घरेलु खेल मलेसियामा खेल्न लागेको हो । नेपाल एसियन कपको छनोटबाट बाहिरिइसकेको छ । नेपाल आफ्नो समूहमा अंकविहीन छ । नेपालले मलेसिया, लाओस र भियतनामलाई नतिजा सुम्पिएको छ । एन्फाले एएफसीलाई तत्काल छनोट प्रतियोगिताका लागि स्वदेशी प्रशिक्षक नियुक्त गर्न अनुमति मागेको थियो ।
