नेपाली राष्ट्रिय क्रिकेट टोलीले कुवेतलाई ५८ रनले हराउँदै आइसिसी टी–२० विश्वकपअन्तर्गत एसियन छनोटमा सानदार सुरुवात गरेको छ । ओमान क्रिकेट एकेडेमी १ मा बुधबार पहिलो ब्याटिङ गरेको नेपालले २० ओभरमा ६ विकेट गुमाएर १४१ रनको मध्यम योगफल खडा गरेको थियो । प्रत्युत्तरमा १४२ रनको लक्ष्य पछ्याएको कुवेत १८.१ ओभरमा ८३ रनमा समेटिँदा नेपाल ५८ रनले विजयी भयो ।
नेपाल लगातार दोस्रोपटक र समग्रमा तेस्रोपटक आइसिसी टी–२० विश्वकप खेल्ने लक्ष्यका साथ ओमान पुगेको हो । नेपालले समूह ‘बी’मा महत्वपूर्ण २ अंक जोडेको छ । अब नेपालले जापानविरुद्ध शुक्रबार अन्तिम खेल खेल्नेछ । यस खेलमा जित निकाल्दा समूह विजेताका रूपमा नेपाल सुपर सिक्समा पुग्नेछ ।
लक्ष्य रक्षा गर्ने क्रममा सोमपाल कामी, नन्दन यादव, ललितनारायण राजवंशी, कुशल भुर्तेल तथा रोहितकुमार पौडेलले उत्कृष्ट बलिङ गरेका थिए । सोमपालले दुई ओभरमा ३ रन खर्चेर एक विकेट लिए । नन्दनले पनि दुई ओभरमा ११ रन दिँदै एक विकेट हात पारे । ललित राजवंशी, सन्दीप लामिछाने र रोहित पौडेलले समान दुई विकेट लिए । अलराउन्डर दीपेन्द्रसिंह ऐरीले तीन ओभरमा १० रन खर्चेका थिए । सन्दीपले आफ्नो बलिङ स्पेलमा एक मेडन फ्याँकेका थिए ।
कुवेतको मध्य तथा पुछारका ब्याट्सम्यान चल्न नसक्दा नेपाली बलर हाबी भए । इनिङ्सको एक समय कुवेत ५६–४ को स्थितिमा थियो । त्यसपछि थप २७ रन जोड्दा कुवेतले बाँकी विकेट गुमाउँदा ८३ रनमा अलआउट भयो । ओमानमा चलिरहेको छनोटबाट तीन राष्ट्रले आगामी वर्षको फेब्रुअरी–मार्चमा भारत र श्रीलंकामा हुने आइसिसी टी–२० विश्वकप २०२६ मा स्थान बनाउनेछन् । सुपर सिक्सका शीर्ष तीन टोलीले विश्वकपमा स्थान बनाउनेछन् । एसिया छनोटमा नेपालसहित मलेसिया, कतार, युएई, ओमान, पपुवा न्युगनी र सामोआले प्रतिस्पर्धा गरिरहेका छन् । अर्को वर्ष आयोजना हुने विश्वकपमा १७ राष्ट्रले स्थान पक्का गरिसकेका छन् ।
भुर्तेलको १२औँ अर्धशतकीय इनिङ्स
कमजोर सुरुवात गरेको नेपालले ओपनर कुशल भुर्तेलको अर्धशतकीय योगदान पाएको थियो । इनिङ्सको १९.५ ओभरमा आफ्नो विकेट गुमाउनुअघि भुर्तेलले ५६ बलको सामना गरी समान तीन चौका र छक्का प्रहार गरी ६६ रनको योगदान दिएका थिए । टी–२० आईमा उनको यो १२औँ अर्धशतक हो । उनले अहिलेसम्म नेपालबाट ६५ टी–२० आई खेलेका छन् । मध्यक्रमका ब्याट्सम्यानले गतिलो योगदान दिन नसक्दा नेपालको ब्याटिङ कमजोर देखिएको थियो । तल्लो क्रमका गुल्सन झाले ६ बलमा तीन छक्काको सहयोगमा २० रन जोडेपछि नेपालले कुवेतलाई मध्यम योगफल दिएको हो । भरपर्दा ब्याट्सम्यान ओपनर आसिफ शेख २, कप्तान रोहित पौडेल १६ र दीपेन्द्रसिंह ऐरीले २० रनको योगदान दिए । सन्दीप जोरा ५ र कुशल मल्ल ४ रनमा आउट भए ।
ओमानको क्रिकेट एकेडेमी १ मैदानमा नेपालका कुनै पनि ब्याट्सम्यानले कुवेतको बलिङविरुद्ध खुलेर सामना गर्न सकेनन् । नेपालले १९औँ ओभरमा २७ रन जोडेको थियो । कुवेतका नवीन राजेन्द्रनको ओभरमा गुल्सनले तीन छक्का र भुर्तेलले दुई चौका प्रहार गरेका थिए । यस ओभरबाट नेपालको रनरेट बढेको थियो । कुवेतका तीव्र गतिका बलर मोहम्मद अकिफ फारुकले तेस्रो ओभरमा आसिफलाई एलबिडब्लू आउट गरे । लेग स्पिनर नवीन राजेन्द्रनले कप्तान पौडेललाई बोल्ड गरे । नेपालको इनिङ्स एक समय ७.२ ओभरमा ४६–२ को अवस्थामा थियो । मल्ल र जोरालाई गुमाउँदा नेपाल ११.४ ओभरमा ६३–४ को नाजुक अवस्थामा पुगेको थियो । कुवेतका नवीन राजेन्द्रनले ४ ओभरमा ४० रन खर्चेर दुई विकेट लिए । अनुपदीपले पनि दुई विकेट हात पारे ।
युएई सात विकटले विजयी
युएईले समूह ‘ए’मा कतारमाथि सात विकेटको जित निकालेको छ । पहिलो ब्याटिङ गरेको कतारले २० ओभरमा आठ विकेट गुमाउँदै ११८ रनको मध्यम योगफल बनायो । प्रत्युत्तरमा युएईले १८.३ ओभरमा तीन विकेटको नोक्सानीमा ११९ रन जोड्दै जित हात पार्यो । युएईको जितमा तेस्रो क्रमका ब्याट्सम्यान अलिसान साराफुले अर्धशतकीय योगदान दिएका थिए । उनले ४२ बलमा चार चौका र दुई छक्का प्रहार गरी सर्वाधिक ५१ रन बनाए । यसैगरी हर्षित कौशिकले ३० बलमा तीन छक्काको सहयोगमा ३७ रन बनाएका थिए ।
यसअघि कतारको ब्याटिङमा ओपनरद्वय इमाल लियानागे र जुविर अली शून्यमा आउट भएका थिए । मोहमद असिम पनि शून्यमै पेभेलियन फर्कंदा कतारले १.३ ओभरमा तीन विकेट गुमाएर ५ रन जोडेको थियो । त्यसपछि कप्तान मिर्जा मोहमदले ३० तथा सहजैव जमिलले २० रन जोडे । बलिङमा युएईका मुहमद रोहिदले १३ रन खर्चेर दुई विकेट लिए । जाहिद अलीले पनि दुई विकेट हात पारे ।
नवप्रवेशी सामोआ पराजित
ओमानले समूह ‘सी’को विश्वकप छनोटको नवप्रवेशी राष्ट्र सामोआलाई पाँच विकेटले हराएको छ । पहिलो ब्याटिङ गरेको सामोआले २० ओभरमा ९ विकेटको क्षतिमा ९२ रनको मध्यम योगफल खडा गरेको थियो । ओमानले १७ ओभरमा पाँच विकेट गुमाएर ९६ रन जोडेको थियो । खेलमा ओमानका साह फैसल म्यान अफ दी म्याच भए । उनले १२ रन खर्चेर दुई विकेट लिएका थिए । ९३ रनको सहज लक्ष्य पछ्याएको ओमानका लागि हमाद मिर्जाले २८ बलमा १८, आर्यानले १७ बलमा १४ तथा मोहमद नदिमले २२ बलमा २१ रनको योगदान दिएका थिए । ओमानको बलिङमा फैसलबाहेक नदिम र आमिर कलिमले समान दुई विकेट हात पारेका थिए ।
