रामेछाप विमानस्थलबाट तीन निजी विमान कम्पनीहरूले रामेछाप–काठमाडौं हप्ताको तीन उडान भर्ने भएका छन् ।यसअघि रामेछापका बासिन्दाले रामेछाप–काठमाडौं उडानको माग गर्दै आए तापनि विमान कम्पनीहरूले बेवास्ता गर्दै आएका थिए ।
देशको विषम परिस्थितिमा वर्षातसँगै आएको बाढीले चाडपर्व मनाएर राजधानी फर्कने यात्रुहरूको सुविधालाई ध्यानमा राखी विमान कम्पनीहरूले सेवा दिनुपर्नेमा उक्त सेवा रामेछापका बासिन्दालाई नदिएको भन्दै मंगलबार शान्तिदीप युवा क्लबका युवाहरू र जेन–जी युवाहरूले जिल्ला प्रशासन कार्यालय र सम्बन्धित वायुसेवा कम्पनीहरूलाई तीन दिनभित्र उडान भर्न मागपत्र पेस गरेका थिए ।
सोही मागपत्रको आधारमा बुधबार (आज)बाट तिहारसम्म तीन निजी विमान कम्पनीहरूले हप्तामा तीन उडान भर्ने सहमति भएपछि हप्ताको तीन दिन रामेछाप–काठमाडौं उडान हुने भएको हो । शान्तिदीप युवा क्लब, जेन–जी समूह र सम्बन्धित तीन निजी वायुसेवाका प्रतिनिधिहरूसँग भएको छलफलबाट बिहीबार समिट एयर, शुक्रबार सीता एयर र शनिबार तारा एयरले उडान भर्ने सहमति हिजो साँझ भएको हो ।
छलफलको क्रममा तिहारपछि हप्ताको एक उडान नियमित गर्नेसमेत सहमति भएको र त्यसका लागि विमान कम्पनीहरूले सम्बन्धित नागरिक उड्डयन प्राधिकरणसँग समन्वय गरी उडान तालिका सार्वजनिक गर्ने लिखित सहमति भएको शान्तिदीप युवा क्लबका अध्यक्ष सुरेश उदासले जानकारी दिए । जसअन्तर्गत बुधार नै समिट एयरले नागरिक उड्डयन प्राधिकरणबाट उडान तालिका लिई सार्वजनिक गरिसकेको र अन्य दुई कम्पनीले पनि उडान अनुमति माग गर्ने जनाएका छन् । आज समिट एयरले रामेछापबाट यात्रु लिएर काठमाडौं उडान भर्ने तालिका रहेको छ ।
