काभ्रेपलाञ्चोकको नमोबुद्ध नगरपालिका– ६, चौकीडाँडामा सोमबार दिउँसो टन्टलापुर घामको पर्वाह नगरी दुई महिनाकी सुत्केरी दुर्गामाया तामाङ पाँच घण्टा हिँडेर पसिना पुछ्दै आइपुगेकी थिइन् । काठमाडौँ बस्दै आएकी उदयपुर गाईघाटकी दुर्गामाया १४ असोजमा माइतीघर काभ्रेपलाञ्चोकको रोशी गाउँपालिका– १२, घ्याङडाँडा गएकी थिइन् । माइतीसम्मै बसमा पुगेकी दुर्गामाया अविरल वर्षापछिको बाढीले बिपी राजमार्ग बगाएपछि माइतीमै थुनिएकी थिइन् । अफिस खुल्ने भएपछि बहिनीलाई बच्चा बोकाएर उकाली–ओराली गर्दै चौकीडाँडा आइपुगेको उनले बताइन् । रोशी गाउँपालिका– १२ बाट ११, १०, ९, ८ र ६ हुँदै चौकीडाँडा आइपुुगेकी दुर्गामायाले अति नै सास्ती भोगेर आइपुगेको बताइन् ।
रोशी गाउँपालिका– ७ कटुन्जेबाट काठमाडौँ हिँडेकी सीमा तामाङ बडो सास्तीबिच चौकीडाँडाको पहिरोमा उर्लिरहेको रोशीको तीर पार गरिन् । चार हातपाउ टेकेर पहिरो पार गरेपछि लामो सास फेर्दै भनिन्, ‘अब त बाँच्ने भो ।’
यस्तै, तेमाल भोज्रयाङकी माया तामाङ चार दिनअघि रोशी गाउँपालिका– ६, सिपालीमा रहेको माइती घर गएकी थिइन् । झरी परेर बाटो बिग्रेपछि अप्ठ्यारो बाटो छिचोल्दै बल्ल चौकीडाँडा आइपुगेकी थिइन् । ‘चार दिनअघि माइत सिपाली गएकी थिएँ । आधा घण्टामा पुग्ने ठाउँमा बाढीले बाटो बिगारेपछि हिँडेर आउन तीन घण्टा लाग्यो,’ उनले भनिन्, ‘माइत पनि बेकारमा आएछुँ जस्तै भयो ।’
बिपी राजमार्ग हुँदै माइती गएका र विभिन्न ठाउँमा दसैँ मान्न गएकाहरू दुःख झेल्दै गन्तव्य फर्कन थालेका छन् । सयाैँ यात्रु यसरी नै सास्ती खेप्दै गन्तव्यतर्फ फर्कनेको ताँती रहेको छ ।
बिपी राजमार्गको रोशीखोला क्षेत्रमा गत वर्ष असोजमा आएको बाढीले बगाएपछि बनाएको अस्थायी डाइभर्सन यस वर्षको १८ देखि १९ असोजको बाढीले पुनः बगाइदिएपछि अहिले पूर्ण रूपमा अवरुद्ध छ । राजमार्गको बोक्सेकुना, घुमाउने, चौकीडाँडा, डालाबेँसी, पिप्ले, माम्ती, चरङ्गेफेदीमा अस्थायी रूपमा बनाइएको डाइर्भसन शनिबारदेखिको वर्षाले पुनः क्षति गराएसँगै राजमार्ग पूर्ण रूपले ठप्प भएको छ ।
गत वर्ष यी सबै स्थानमा बाढीले पक्की राजमार्ग बगाएको थियो । क्षति भएको राजमार्ग सडक डिभिजनले करिब १० करोड लगानीमा डाइभर्सन बनाई अस्थायी रूपमा सञ्चालनमा ल्याएको थियो ।
बिपी राजमार्ग बन्द हुँदा नेपालको पूर्वी भाग जोड्ने छोटो दूरीको यात्रुहरूलाई सास्ती हुनुको साथै काभ्रे जिल्लाको रोशी, महाभारत, तेमाल गाउँपालिका र नमोबुद्ध नगरपालिकाको केही भागलाई यातायातमा असर परेको छ ।
