साबिक उपविजेता ललितपुर क्विन्सले दोस्रो संस्करणको एभरेस्ट महिला भलिबल लिगमा तेस्रो जित निकालेको छ । घरेलु टोली पोखरा निन्जाजले भने लगातार तेस्रो खेलमा हारको सामना गरेको छ । पोखरा रंगशालास्थित बहुउद्देश्यीय कभर्ड हलमा आइतबार भएको पहिलो खेलमा काठमाडौं स्पाइकर्सले मधेश युनाइटेडलाई ३–१ को सेटले हराउँदै पहिलो जित निकाल्यो । दुई खेल खेलेको काठमाडौंले यसअघिको खेल गुमाएको थियो ।
काठमाडौंले पहिलो सेट २६–२४ ले आफ्नो पक्षमा पारेको थियो । तर, दोस्रो सेटमा काठमाडौं २३–२५ ले पराजित भयो । १–१ को बराबरी अवस्थामा काठमाडौंले उत्कृष्ट पुनरागमन गर्दै त्यसपछिका दुई सेट आफ्नो पक्षमा पार्यो । काठमाडौंले तेस्रो सेट २५–२३ र चौथो सेट २५–१९ ले जितेको थियो । लिगमा तीन खेल खेलेको मधेशले एकमा जित र दुईमा हारको सामना गरेको छ ।
दोस्रो खेलमा लुम्बिनी लाभाजले पोखरालाई ३–२ को सेटले पराजित ग¥यो । पहिलो सेटमा पोखरा २५–१३ ले पछि परेको थियो । त्यसपछिका दुई सेट २३–२५ र १०–२५ ले पोखराले आफ्नो पक्षमा पारेको थियो । एक सेटले अग्रता लिएको पोखराले आफ्नो अग्रता रक्षा गर्न सकेन । त्यसपछिका दुई सेटमा पराजित हुँदा लिगमा तेस्रो हारको सामना गर्न पुग्यो ।
लुम्बिनीले पोखराविरुद्ध चौथो सेट २६–२८ र पाँचौँ सेट १०–१५ ले आफ्नो पक्षमा पार्दै लिगमा अपराजित यात्रा जारी राख्यो । लुम्बिनीको लिगमा लगातार तेस्रो जित हो । प्रतियोगिताअन्तर्गत सोमबार पहिलो खेल कर्णाली र काठमाडौंबिच हुनेछ । ललितपुरले दोस्रो खेलमा लुम्बिनीको सामना गर्नेछ ।
