ओलम्पिक काउन्सिल अफ एसिया (ओसिए)ले आफ्नो लोगो दुरुपयोग नगर्न सरकारद्वारा गठिन नेपाल ओलम्पिक कमिटीको तदर्थ समितिलाई चेतावनी दिएको छ ।
आइतबार ओसिएका जेनेरल डाइरेक्टर हुसैन अल मुसालामले संयोजक ध्रुवबहादुर प्रधानलाई पत्र लेख्दै यसअघि गरिएको लोगो दुरुपयोग नगर्न निर्देशन दिएका छन् । उनले यो पत्र नै आधिकारिक रहेको दाबी गरेका छन् । यदि दिएको निर्देशन अवज्ञा गरेको खण्डमा कानुनी कारबाही अगाडि बढाउने पनि चेतावनी हुसैनले दिएका छन् ।
गत पुसमा विधान संशोधन गर्दै जीवनराम श्रेष्ठ नेपाल ओलम्पिक कमिटी (एनओसी)को तेस्रोपटक अध्यक्ष भएका थिए । यसपछि यो कमिटीलाई नेपाल सरकारले मान्यता दिएको छैन ।
प्रधानमन्त्री केपी शर्मा अोलीको निर्देशनपछि खेलकुदमन्त्री तेजुलाल चौधरीको सक्रियातामा तदर्थ समिति गठन भयो । प्रधानको संयोजकत्वमा नाै सदस्यीय कमिटी बनेको छ । यही कमिटीले एनओसी, ओसिए र अन्तर्राष्ट्रिय ओलम्पिक कमिटी (आइओसी)को लोगो प्रयोग गर्दै आएको छ ।
यस्तै, तदर्थ समितिले सातदोबाटोस्थित एनओसीको भवन नै प्रयोगमा ल्याएको थियो । यसअघि सरकारले यो भवनमा ताला लगाएको थियो । यो सबै घटनापछि आइतबार प्रधानलाई ओसिएले पत्र काटेको हो । प्रधान यसअघि एनअोसीको स्वायत्तताका लागि लड्दै आएका थिए । प्रधान यसअघि एनओसीमा दुई कार्यकाल समान अध्यक्ष र महासचिव रहिसकेका छन् ।
