घर भत्किएर किच्दा सर्लाहीको चन्द्रनगरमा एक बालकको ज्यान गएको छ ।
चन्द्रनगर गाउँपालिका– ६ कामद टोलमा घर भत्किएर किच्दा सोही स्थान बस्ने गौतम माझीका ६ वर्षीय छोरा अरुण माझीको बुधबार मृत्यु भएको हो ।
प्रहरीका अनुसार दिउँसो ४ः३० बजेको समयमा नवीन सिंहको पुरानो दुईतले पक्की घर अचानक भत्किएको थियो ।
आँगनमा खेलिरहेका बालकलाई भत्किएको घरले किचेको जिल्ला प्रहरी कार्यालय सर्लाहीका प्रवक्ता प्रहरी नायब उपरीक्षक सरोज राईले जानकारी दिए । घटनालगत्तै स्थानीयले भत्किएको घरभित्र अन्य मानिसहसमेत पुरिएको आशंकासहित प्रहरीलाई खबर गरेका थिए । लगत्तै पुगेको प्रहरी टोलीले स्थानीय र जेसिबीको सहायतामा भग्नावशेष हटाएको छ ।
काठ, इँटा र माटोले बनेको उक्त पुरानो घर जीर्ण भएर लडेको हुन सक्ने प्रहरीको आशंका छ । घटनाको विषयमा थप अनुसन्धान भइरहेको प्रहरी नायब उपरीक्षक राईले बताए । प्रहरीले बालकको शव परीक्षणको लागि प्रादेशिक अस्पताल मलंगवामा पुर्याएको छ ।
