कञ्चनपुरको महाकाली प्रादेशिक अस्पतालमा एटिएम सेवा सुरु भएको छ । नेपाल बैंक लिमिटेडले भीमदत्त नगरपालिका– १८ महेन्द्रनगरस्थित महाकाली प्रादेशिक अस्पतालमा एटिएम सेवा सुरु भएको हो । सोमबारदेखि अस्पतालको मूलगेटमा एटिएम सेवा सुरु गरिएको बैंकले जनाएको छ ।
नेपाल बैंक सुदूरपश्चिम प्रादेशिक कार्यालय धनगढीका उपप्रमुख कमलबहादुर चन्दले बिरामी सेवाग्राहीको आवश्यकतालाई मध्यनगर गर्दै एटिएम सेवा सुरु गरिएको बताए । उनले भने, ‘बिरामीको उपचार सहजका लागि हामीले एटिएम सेवा अस्पतालमै दिएका छौँ, यो सेवा निरन्तर सञ्चालन हुन्छ ।’
चन्दका अनुसार झन्डै ६ वर्षअघि तत्कालीन महाकाली अस्पतालका अध्यक्ष कृष्णदत्त जोशी (बोक्सर)को कार्यकालमा एटिएम राख्ने निर्णयअनुरूप संरचना बनाइएको थियो । महाकाली अस्पतालका निमित्त मेसु डा. अर्जुनकुमार भट्टले एटिएम सेवा सञ्चालन भएसँगै बिरामीलाई सुविधा पुगेको बताए । बिरामीका आफन्तले समेत एटिएम सेवा अस्पतालमै सुरु भएपछि उपचारमा सुविधा भएको बताएका छन् ।
