राष्ट्रिय ध्वजावाहक नेपाल वायुसेवा निगमले एउटा जहाज मर्मत गरेर आन्तरिक उडानमा फर्केको छ । नयाँ इन्जिन फेरेर ट्विनअटर ९एन–एबियू विमानले सोमबारदेखि व्यावसायिक उडान थालेको निगमका प्रवक्ता रमेश पौडेलले जानकारी दिए ।
सोमबार काठमाडौंबाट सोलुखुम्बुको फाप्लु विमानस्थलमा उडान गरेको विमानले मंगलबार काठमाडौं–भोजपुर उडान गरेको थियो । ‘मर्मत गरेको एबियू जहाजबाट आन्तरिकतर्फ नियमित यात्रु उडान सुरु भएको छ,’ उनले भने ।
इन्जिनको उडान आवर सकिएर ७ पुसमा एबियू जहाज ग्राउन्डेड भएपछि निगमको आन्तरिक उडान ठप्प थियो । त्यसअघि गत २३ जेठमा ट्विनअटर ९एन–एबिटी ग्राउन्डेड भइसकेको थियो । निगम व्यवस्थापनले समयमै इन्जिनको जोहो गर्न नसक्दा राष्ट्रिय ध्वजावाहकको तीन महिनासम्म आन्तरिक उडान ठप्प हुन पुगेको थियो । मर्मत गरिएको जहाज पनि ग्राउन्डेड भएको ९३ दिनपछि नियमित उडानमा फर्किएको हो । २३ जेठदेखि ग्राउन्डेड एबिटी ट्विनअटर भने सञ्चालनमा आउने अझै टुंगो छैन ।
जहाज मर्मतका लागि अर्डर गरिएका तीनवटा इन्जिनमध्ये दुईवटा आइपुगेको निगमले जनाएको छ । ‘एउटा इन्जिन एबियूमा जडान गरेर उडानमा फर्किसक्यो, अर्को इन्जिन पनि ग्राउन्डेड भएर बसेको जहाजमा जडान गर्ने योजना छ,’ निगम स्रोतले भन्यो ।
१३ वर्षदेखि ग्राउन्डेड छन् जहाज
निगमसँग आन्तरिकतर्फ तीनवटा ट्विनअटर र पाँचवटा चिनियाँ जहाज रहेका छन् । जसमध्ये एउटा ट्विनअटर विमान १३ वर्षदेखि ग्राउन्डेड छ । चिनियाँ जहाज ‘दुईवटा एमए–६० र तीनवटा वाई १२ई) उडाउँदा आम्दानीभन्दा खर्च धेरै भएपछि असार ०७७ देखि सधैँका लागि ग्राउन्डेड गरिएको छ ।
निगम व्यवस्थापनको चरम लापरबाहीका कारण ट्विनअटर महिनौँ ग्राउन्डेड गर्नुपरेको स्रोतको भनाइ छ । ‘निगमसँग भएका जगेडा इन्जिनहरू समयमै मर्मत गरेर राखिएन, जहाज ग्राउन्डेड हुने समय आएपछि बल्ल इन्जिन मर्मत तथा लिजका लागि एमआरओ छनोटको काम सुरु गर्दा समस्या हुने गरेको छ,’ स्रोतले भन्यो ।
जहाज मर्मत सकेर उडानमा फर्किँदा पाइलट अयोग्य
पाइलटलाई तयारी अवस्थामा राख्न पनि निगम व्यवस्थापन चुकेको छ । ग्राउन्डेड भएको एबियू तीन महिनापछि इन्जिन फेरेर उडानयोग्य त बन्यो, तर उडान गर्ने पाइलटको ‘पाइलट दक्षता परीक्षण (पिपिसी)’को म्याद सकिएको पत्तो भएन ।
व्यावसायिक उडान गर्ने पाइलटले तीन–तीन महिनामा पिपिसी प्रमाणीकरण गर्नुपर्ने प्रावधान छ । पाइलटलाई तयारी अवस्थामा नराख्दा बल्लतल्ल मर्मत भएको जहाज पनि समयमै उडाउन नसकिएको स्रोतको भनाइ छ । ‘तारा एयरको पाइलट ल्याएर परीक्षण उडान गरी निगमका पाइलटको पिपिसी प्रमाणीकरण गरेपछि बल्ल उडानको बाटो खुलेको हो,’ स्रोतले भन्यो ।
अहिले पनि निगमका पाइलटको पिपिसी प्रमाणीकरण गर्ने काम भइरहेको स्रोत बताउँछ । मंगलबार सिमरा उडान गर्नुपर्ने जहाज पाइलटको पिपिसी क्लियर गर्नका लागि पोखरा उडान गरिएको स्रोतको भनाइ छ । निगमले मासिक सातदेखि १० लाख रुपैयाँसम्म तलब दिएर राखेका आइपी, क्याप्टेन र को–पाइलट पिपिसी प्रमाणीकरण नहुँदा फुर्सदिला बनेका छन् ।
