काभ्रेको पनौती नगरपालिकाले नगरभित्रका तीनवटा खानी उद्योग सञ्चालनमा रोक लगाएको छ । खानी तथा भूगर्भ विभागबाट जारी उत्खनन अवधि समाप्त भएका पनौती– २ मा सञ्चालित डायमन्ड स्टोन माइनिङ प्रालि तथा वडा नम्बर १२ मा रहेका भालेश्वर रोडाढुंगा उद्योग र दीपलक्ष्मी एग्रिगेट एन्ड माइनिङ सञ्चालनमा रोक लगाइएको हो ।
उत्खनन अवधि समाप्त भइसकेपछि पटकपटक ताकेता गर्दासमेत बन्द नभएपछि निर्णय नै बिहीबारबाट रोक लगाइएको मेयर रामशरण भण्डारीले बताए । सरोकारवालासहितको बैठकले नगर क्षेत्रभित्र सञ्चालित खानी तथा क्रसर उद्योगलाई सात दिनभित्र कागजात पेस गर्न पनि भनेको छ ।
बिहीबार जारी सूचनामा पनौती क्षेत्रभित्र सञ्चालनमा रहेका क्रसर उद्योगले कच्चा पदार्थका स्राेत सुनिश्चितता, क्रसरसँग सम्बन्धित दर्ता, नवीकरण, कर चुक्ता तथा सञ्चालन अनुमतिसहितका कागजात सात दिनभित्र पेस गर्न भनिएको छ ।
अवधि समाप्त भएका उद्योगलाई सञ्चालन अनुमति नलिएसम्म रोक लगाइने मेयर भण्डारीले बताए । ‘क्रसर उद्योगका कागजात माग गरेका छौँ । अवधि समाप्त भएकाको हकमा रोक लगाउनेछौँ,’ उनले भने, ‘सञ्चालन अवधि भए पनि स्रोत सुनिश्चितता नभएमा र डस्ट व्यवस्थापन गर्ने ठाउँ सुनिश्चितता नगरेको पाइए सञ्चालन गर्न दिनेछैनौँ ।’
